Menteryo sa Caretta hugaw ug laksot

Ang labing dako nga menteryo diha sa Barangay Caretta gidumala sa kadagkoan sa duha ka simbahan – ang Santo Rosario Church ug ang Cebu Metropolitan Cathedral.

Gibahin nila ang sam-ang, ang katunga gidumala sa Cathedral ug ang laing katunga, gidumala usab sa kaparian sa Santo Rosario. Kinsa ang maayong modumala kanila?

Gitandi nako ang pag-atiman sa maong mga sam-ang, ug akong naaninaw nga mas bentaha ang pag-atiman sa kadagkoan sa Santo Rosario Church sa ilang menteryo. Wala magkuwang ang kadagkoan sa Cathedral, kay sama sa gihimo sa kaparian sa Santo Rosario, mitudlo usab sila og “caretaker” nga maoy gitugyanan sa pag-atiman sa menteryo. Nakabisita ko sa miaging semana sa lubong sa akong mga ginikanan diha sa menteryo nga gidumala sa Cathedral. Nakapanglingu-lingo ko kay nakita nako ang kahugaw sa palibot.

Nakita nako ang mga “illegal structures” nga gipasagdan ra sa tagdumala sa menteryo. Unahon nato pagtuki ang kahugaw. Nganong dili man limpyohan kanunay ang mga sagbot diha sa menteryo?

Isip caretaker sa menteryo, angay’ng tigumon niya ang mga tawo nga anaa manginabuhi diha sa sam-ang pinaagi sa paghimo og mga lapida, pagsirado sa mga lubong, ug uban pa nga gimbuhaton nga sila makakuwarta.

Angay’ng mandoan sila nga human sa ilang trabaho, sila maoy mohipos sa ilang mga hugaw, sama sa tipak-tipak sa mga semento, tipak sa mga tiles, ug mga bato.

Ang mga gisweldohan sa caretaker angay’ng mohipos dayon sa mga buwak nga gihalad sa mga gipanglubong, ug hiposon ang kabahin sa mga gipanghabwa nga minatay.

Nagtuo ko nga wala’y klaro nga trabaho ang mga gisweldohan sa pag-atiman sa menteryo nga gidumala sa Cathedral. Mentras sayo pa, angay nga sila molihok na. Unya, angay gyud unta nga did-an ang paghimo og illegal structures, sama sa pagbutang og “extension” nga lingkuranan ug bisan unsa nga anaa na sa agianan sa tawo. Angay’ng panggub-on ang mga illegal structures, mentras sayo pa, ug mandoan ang mga tawo nga anaa manginabuhi sa sam-ang, nga dili gayud sila mohimo niining maong mga gimbuhaton.

Daghan kaayo nga angay’ng himoon diha sa menteryo aron nga makakuha kamo og pagdayeg gikan sa publiko. Kamo sab diha sa Cathedral, ayaw lang gyud ninyo isalig ngadto sa caretaker nga inyong gitudlo ang pagdumala sa menteryo. Kinahanglan nga matag karon ug unya, mosusi sab kamo diha. Ang dapit sa opisina hinoon sa sepulturero, nindot na, apan ang dapit sa mga lubnganan, nagpabiling hugaw ug laksot.