PRRD ug POTUS

Tungod sa nabisto nga transcript sa panagsulti sa telepono nilang Presidente Rodrigo Duterte ug US President Donald Trump, nahibaw-an na sa tibuok kalibutan nga lahi ang ngalan nga gihatag ni Duterte sa iyang kaugalingon ug dili sab naandan ang tawag ni Trump niya:

Gipaila ni Duterte ang iyang kaugalingon ngadto sa operator sa telepono sa White House nga “PRRD” para sa tibuok niyang ngalan nga Presidente Rodrigo Roa Duterte; ug

Gitawag siya ni Trump pagsugod nila og estorya nga “Mr. President” ug dayon “Rodrigo” hangtod nga nahuman.

* * *

Ang pagtawag ni Duterte sa iyang kaugalingon nga “PRRD” nagpasabot nga giganahan sa opisyal niyang titulo. Sukwahi sa iyang gipatuo nga mas ganahan gihapon siyang tawgon nga “Mayor.” PRRD sab ang gigamit sa opisyal nga mga komunikasyon sa Malakanyang ug ubang mga buhatan sa gobiyerno.

Gani, sa transcript nga gidudahang naggikan sa Department of Foreign Affairs (DFA) sa Pilipinas, ginganlan sab si Duterte  nga “PRRD” ug si Trump nga “POTUS” (President of the United States). Apan bakikaw og diyutay kun si Duterte motawag sa iyang kaugalingon sa opisyal niyang acronym.

* * *

Maayo na lang nga wa siya sungoga ni Trump pinaagi sa paggamit sab sa iyang kaugalingong acronym nga “DJTS” (Donald John Trump Sr.). Bisan nagsige lang og “Mr. President” si Duterte niya, si Trump nisuway sa makadaghan nga higayon sa pakigsuod niya.

Nagpangikog si Trump nga nangutana dili pa ba lawom na nga gabii sa Pilipinas. Dihang gipasaligan siyang Duterte nga nanihapon pa siya uban sa mga pangulo sa kanasuran sa ASEAN, nitubag si Trump nga pareho sila si Duterte nga dugay matulog ug mubo ra’g kinatulgan ug nidapit ni Duterte sa White House sa dili pa siya moduaw sa Pilipinas karong Nobiyembre.

* * *

Kumpleto ang paghingan ni Duterte sa ubang mga lider sa nasud nga ilang nahisgutan: Si Kim Jong Un sa North Korea ug si Presidente Xi Jinping sa China.

Wa hinuon sila’y lipud-lipod nga nanglibak ni Kim, nga gitawag ni Duterte nga buang-buang kay nagsige og ngisi samtang nipaulbo og rockets nga iyang giisip nga mga duwaan.

Niuyon si Trump nga si Kim buang nga may mga armas nukleyar apan wa pa’y delivery system.  ([email protected])