Kuhaon na sa inahan ang bata nga gibilin sa apuhan

Dear Atty. Divine,

Ang akong apo gibilin diri nako sa dihang kini bag-o pa nga natawo kay ang inahan milarga sa abroad, samtang ang amahan sa bata nga akong anak, nanarbaho sab. Ako maoy nagpadako sa bata hangtod karon nga 4-anyos na ang akong apo.

Karong bag-o, miuli ang inahan ug miduaw sa bata, ug matud niya nga dili na gyud sila magkasabot sa akong anak busa kinahanglan na gyud sila nga magbuwag. Ang plano sa inahan nga iya na nga kuhaon ang bata.

Naluoy ko sa akong apo kay dili man gyud siya moduol sa inahan kay wa man siya kaila niini kay ako may nagpadako sa bata. Ang akong pangutana, may paagi ba nga akong mapugngan ang pagkuha sa inahan sa akong apo? Daghang salamat. — Lucia

Dear Lucia,

Base sa balaod ug sa mga desisyon sa Korte Suprema, ang mga ginikanan sa bata mao gyud ang mas dunay katungod sa ilang anak. Matud sa labaw’ng hukmanan nga ang parental authority sa mga ginikanan dili mahimong ika-transfer ngadto sa laing tawo, gawas lang sa kaso sa adoption, guardianship o kun ang bata gi-surrender sa usa ka children’s home or  institution.

Sa imo nga kaso, kun ang bata gitugyan sa inahan ang custody diha kanimo sa dihang kini bag-o pa nga natawo, makonsiderar kini nga temporary lang ang iyang pagtugyan sa custody sa bata nganha kanimo ug busa bisan unsang orasa mahimo niya nga kuhaon pagbalik ang bata. Ang maayo nimong buhaton mao ang pagpakigsabot sa inahan nga kun kuhaon niya ang bata, tugutan ka niya nga makabisita or tugutan niya ang bata nga makapuyo sa inyo panahon sa bakasyon. Mas maayo nga makigsabot ka na lang sa inahan, inay nga imong babagan ang iyang tinguha sa pagkuha sa bata. Thanks and God Bless! —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.