EDITORYAL - Kalma lang

Dili ikalimod nga daghan na gyud karon ang problema sa katilingbang Filipino. Kining problema sa drugas, kurapsyon, politika, terorismo ug kakabus sa katawhan nga angay sulbaron.

Dako kaayo ang tsansa nga matarong kini pinaagi ni Presidente Duterte nga adunay tinguha nga tarungon ang sistema sa kagamhanan tungod sa kadako sa iyang paghigugma sa nasud.

Tuod man, daghan siya og nahimo, ilabi na sa kampanya batok sa illegal drugs, apan nagpasad usab ang dugo samtang gibuhat kini nga sa kadugayan mura’g pait na ang lami sa dila kay gilad-angan na ang mga tawo. Apan inay nga hupayon ang katawhan, nanghagit pa si Duterte sa iyang mga kritiko nga ipa-impeach siya sa puwesto. Dili lalim ang epekto niini sa katawhang Filipino. Ngano nga kinahanglan man nga ipaagi sa inisog?

 Kun si Duterte ang paestoryahon, husto ang iyang gibuhat ug siguro, wala lang gyud kauyon ang mga tawo sa iyang pamaagi. Anugon lang kining iyang gihimo kun ang pamaagi wala magustohi sa katawhan kay wala man masubay sa balaod. Balaod nga gipanumpaan ni Duterte nga iyang ipatigbabaw labaw pa sa iyang personal nga interes.

Niisa karon ang kilay sa mga tawo sa pamahayag ni Duterte nga duphan niya ug magpapriso siya alang sa mga polis nga nakita sa Senado ug sa National Bureau of Investigation (NBI) nga mituyo gyud pagpatay sa mayor sa Albuera, Leyte nga si Rolando Espinosa Sr.

Ikonsiderar unta ni Duterte nga mas daghan ang nag-obserbar sa iyang mga plano ug programa nga wala mobotar kaniya. Tinuod, si Duterte nakakuha og 16 milyones nga botos, apan dili kini angay nga ipanghambog kay kapin usab sa 26 milyones sa kinatibuk-ang botante nga nibotar sa miaging eleksiyon didto nisuporta sa iyang mga kontra, ug sila dili tanan mga drug lords, tulisan, rapist o kriminal.

Dili makaayo sa nasud kun si Duterte magduwa-duwa sa iyang gahum ug ipanghudlat ang kapolisan ug militar nga matud pa niya nipaluyo kaniya. Kinahanglan siya nga mokalma.