Pagsubli sa hinabang sa US

Nia ang kabahin sa mga pamahayag nilang Senador Patrick Leahy sa Vermont ug Senador Benjamin Cardin sa Maryland mahitungod sa Pilipinas didto sa hawanan sa Amerikanhong Senado niadtong Septiyembre 26 karong tuiga.

 Sen. Leahy:  Mr. President, kapin sa 3,000 ang nangamatay sa Pilipinas sa kampanya ni Presidente Duterte batok sa drugas. Isip tsirman sa Senate Appropriations subcommittee nga nagpundo sa US foreign assistance programs, nahimangod ko nga wa kita makat-on. Ang ekonomikanhong kahigayonan ug seguridad dili makapasalig og kahapsay. Gikinahanglan ang lehitimong gobiyerno ug pagpanalipod sa tawhanong katungod. Isip kanhi prosecutor ug karon sakop sa Judiciary Committee, nahibawo ko nga kun tugotan sa gobiyerno ang laktod nga pagpamatay, mosunod ang kaguliyang. Alang sa gibanabanang 700,000 ka durugista sa Pilipinas, ang kahadlok nga patyon nakaaghat nila pagsurender. Apan tungod sa kanihit sa rehabilitation centers, gipasaad lang nga dili na magbisyo, o gibalhug sa naghuot nga prisohan. Giusikan ni Duterte ang kahigayonan pagtabang sa kaliboan paglingkawas sa drugas. Wa’y pagpamatay nga makatarong sa mga hukmanan o makatabang sa mga biktima sa drugas. Sa makapabalakang timaan, gitangtang isip pangulo sa Senate Justice Committee ang senador nga nagsusi sa mga pangabuso. Gipulihan sa senador nga pabor sa pagpanakop nga wa’y warrant.

Sen. Cardin: Ang 70-anyos na nga relasyon sa Estados Unidos ug Pilipinas mahinungdanon. Apan nahadlok ko nga ang binuhatan ni Presidente Duterte mosangpot sa panagsungi. Kun magpadayon ang pagpamatay, makapaabot kita og kapin sa 6,000 nga maigo sa extra-judicial killings karong tuiga. Dili ni sipyat, tinuyo gyud, bangis nga paglapas sa balaod. Nakasabot ko sa tinguha ni Presidente Duterte pagbadlong sa drugas. Apan ang iyang pag-awhag sa lapad nga pagpamatay, dakong sayop. Makabuong sa kauyonan sa US ug Pilipinas pagpalambo sa demokrasya. Makahasol sab ang iyang plano pagbanhaw sa kakostablehan nga maoy labing abusado sa rehimeng Marcos.

Sen. Leahy: Gikinahanglan ang tukmang lakang sa US. Gisuwat nako ang Leahy Law aron pagsegurong ang US dili molingiw sa mga pagpangyatak sa tawhanong katungod sa mga nagdawat sa atong hinabang ug pagdasig sa kanasuran pagsilot sa mga responsable. Apan kun magdumili si Duterte pag-imbestigar sa mga abuso, mas dako ang problema nga dili masulbad pinaagi sa pagpugong sa hinabang. Angay na kita nga mopahamtang og mga kundisyon sa hinabang sa administrasyong Duterte. Motabang ang State Department pag-umol sa atong hukom sa budget sa 2017. Kasagaran mapugos kita og pili tali sa tawhanong katungod ug nasudnong seguridad. Apan dili kita mahimong makigkunsabo sa mga abuso sa wa’y pagdaot sa atong pagpalambo sa seguridad sa rehiyon. Ang Pilipinas dili makabatok sa terorismo o magpakaaron-ingnon nga lehitimong tagdumala pinaagi sa pagluba sa inosenteng katawhan. Dili perpekto ang US. Pakyas ang atong kampanya batok sa drugas. Apan dili nato suportahan ang mga nigamit og subrang puwersa inay pagpatigbabaw sa balaod. ([email protected])