Ang Prostate (2)

Sa ato nang pagtuki, ang ‘prostate’ kabahin kini sa anatomiya sa lalake, nga ang trabaho ini mao ang pag-epekto sa sistema sa reproduksyon. Nga kun mag-edad na’g 51 pataas, madoble ang gidak-on ini, nga usaha’y mosakit (prostitis) kay na-impeksyon, nga duha lay kapaingnan nga masakit og ‘benign prostate’ ug ‘prostate cancer’.

Ang mga eksperto wa g’yud makatumbok sa nagpaluyong hinungdan ini, apan ila’ng nasiguro nga kun maedaran na magkaluya na kini. Nga inanayon sab ang kahinam, inutilon nga mawad-a’g katakos diha sa kombate sa seksuwal nga kalihokan.

Gamay’ng butang kini nga dako og kakulangan sa atong kinabuhi, kun kini na ang mapalyar, nga maghatag puwerhisyo sa panglawas. Duna’y daghang opinyon, nga mura’g may katinuoran.

Kay pipila sa mga nakaila nato, nga labihan kahigal nga way pugong sa sige’g utas sa pagseks. Hangtud karong naedaran na padayon gihapon sa hambog, nga makabagnos pang bahala’g mangapawot na. Apan ang resulta nasakit og ‘prostate cancer’, kay kuno nanobra ang panguwag.

Ang uban sab nag-ingon, nasakit gihapon og ‘benign prostate’ (non- cancerous), kay sobra ra sab nga way tagad sa pakig-seks, nga ang pares pirme maminghoy nga unta katupsan ang kainit, apan nabugnaw na lang nga dismayadong wa g’yud intawon katugkad nga  tupson ang kalalim.

Unsa man kini ka tinuod? Ang atong mga eksperto nagtambag kanato, nga ang himsog nga pagkighilawas buhaton lang  katulo sa usa ka semana, nga tagsa lang ka sesyon. Pugson nga matagbaw kay basin mahinaykan ang prostate motiyabaw.