Kun dili mosuporta ang amahan sa bata

Dear Atty. Divine,

Mangutana unta ko nimo attorney kun unsaon sa pagpangayo og suporta sa amahan sa akong anak. Kapin sa tuig na ang bata ug naa pa gyud ko’y gisabak karon nga unom ka buwan na. Naa man guy laing babaye ang amahan sa akong anak mao nga gusto unta nako nga magsuporta na lang siya sa bata, lakip na niining akong gisabak ug gusto nako nga dili na siya manghilabot nako ug sa mga bata. Wa man gud ko’y trabaho karon attorney, busa maglisud gyud ko kun dili niya suportahan ang among anak, lakip na kining akong gimabdos ilabi na kun moeskwela na ni puhon. Unsay angayan nako nga buhaton? Daghang salamat. — Rosa

Dear Rosa,

Ang una nimo nga buhaton mao ang pagpadala kaniya og Demand Letter alang sa imong pangayuon nga sustento. Mahimo nga magpatabang ka sa barangay diin siya nagpuyo aron siya ipatawag. Kun dili siya motunga sa barangay, mahimo nga moduol ka og abogado aron maoy mopadala kaniya og demand letter. Kun dili gihapon siya motagad sa imong Demand letter gikan sa abogado, imo na gyud siyang pasakaan og kaso ngadto sa korte.

Mahimo ka nga mopasaka og kasong Criminal base sa Republic Act 9262, kon Anti-Violence Against Women and their Children’s Act kay ang pagdumili niya sa pagsustento sa imong anak, usa ka kalapasan sa maong balaod ug usa kini ka criminal offense ug mahimo siyang mapriso kun mapamatud-an.  Mahimo sab nga mopasaka ka og kasong civil alang sa pagpangayo lang og suporta sa bata ug ang korte na ang mopatawag kaniya ug  mandoan siya paghatag og ayuda, ilabi na kun gi-acknowledge niya ang bata. Thanks and God Bless!  — Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.