Pangaliya sa pag-alim

Gimando sa CBCP nga litukon ni sa tanang simbahan sugod sa Agosto 30 hangtod sa Septiyembre 7, 2016.

Amahan sa wa’y kinutobang kaluoy, modangop mi nimo, katawhang nasamdan sa mga isyung nakabuak namo ngadto sa nagkasungi, nagkalalis, nagkaaway ug masilagong mga tipaka. Nagpakiluoy mi og panaghiusa; nangilaba og pag-alim; nangiliyupo mi nimo pagpasaylo sa among kasal-anan ug pagpahiuli sa among yuta sa kalipay ug kalinaw nga ikaw ray makahatag.

Tudloi mi sa makausa pa sa kaalam sa Kasulatan: Nga ang tabang sa tawo way kapuslanan ug among kusog wa maggikan sa mga prinsipe, kun dili Kanimo.

* * *

Mangaliya mi alang sa mga lider sa nasud. Pailha sila sa imong kagamhanan, aron ilang pasidunggan ang imong imahen nga nia namong tanan. Ipada ang imong Espiritu aron ang milagro sa Pentecost nga ang tanan nagkasinabtanay mopilde sa Babel nga ang among mga lider nagpakauwaw sa usa’g-usa.

Pakunsara ang mga dila sa Balaanong kayo nila sama sa ilang gihimo sa mga apostoles aron ang ilang mga pulong mahimong mga pulong sa kalinaw, kalipay, kamatuoran ug gugma. Nagpasuwabi ang kasilag, Amahan, ug ang kasilag kanunay’ng makamatay!

* * *

Mangaliya mi nga imong limpiyohan ang nasud sa krimen, labi na sa drugas ug sa nakagamot nang pangurakot nga naka-ut-ot sa nasud. Apan hatagi sab mi sa kaalam pag-ila nga kining kadaotan nakagamot sa among kasingkasing: sa among kasina, kahakog ug pinatuyangang kahangol sa mas daghan pa.

Kaloy-i sab ang mga nawad-an sa ilang kinabuhi sa nagpadayong kampanya. Mangaliya mi nila, kay tanang kinabuhi bililhon sa imong panan-aw, ug way lalaki o babaye nga di angayan sa kaluwasan nga gida sa imong Anak alang namong tanan! Hupayang ilang mga pamilya ug tultoling ilang mga anak sa mga agianan sa katarung--kay ikaw ray makahukom ug makatudlo unsay matarong!

* * *

Mangaliya mi alang sa imong Simbahan nga mahimong matinud-anon sa iyang tahas, kay ning higayon sa kalisod ug pagsuway imong giawhag ang Simbahan pagsulti sa Imong Pulong. Ayaw tuguti ang kahadlok ug panagana nga molupig sa kadasig sa imong kamatuoran nga angay’ng mogakos namo.

Nahibawo mi sa among mga sala. Apan nahibawo sab mi nga dihang ang mga propeta sa kakaraanan nangiliyupo nimo sa ilang kamakasasala,

Imo gihapon silang gipasangyaw kay dili ilang pulong ang ilang isangyaw, kun dili, ang imo. Pasaylo ang mga sala sa Simbahan ug himoang kusgan pagserbisyo nimo aron magpabiling asin ug kahayag sa kalibotan.

Sa dugay nang panahon, ang babaye sa Galilee nga imong gipiling Inahan sa Imong Anak nangutana ni Juan Diego: “Di ba ako ang imong inahan?” Sa pangaliya sa atong Inahan, ning takna sa panginahanglan, isalig ang atong kaugalingon.

Gikan niya madasig ta nga mahimong matinud-anong tigsapnay sa imahen sa Imong Anak nga imo mi nga gitawag ug imo mi nga gipili aron among masunod. Amen. ([email protected])