EDITORYAL - Killing me softly

Nagpungasi karon ang mga bati nga isyu nga gibato kang Senador Leila De Lima gikan sa pasangil nga nalambigit kini sa illegal drugs trade ug hasta na ang iyang personal nga kinabuhi nautingkay ug gisumsoman sa social media.

Tungod ba kaha kini sa padayong Senate Inquiry bahin niining nagkadaghang kaso sa extra-judicial killings o kabahin gyud kini sa seryusong “war on drugs” ni Presidente Rodrigo Duterte bahala og si bisan kinsa pa ang maligsan basta mahurot ang tanang mga nalambigit sa ilegal nga drugas.

Ang duha ka habig adunay parehong gibarugan, si De Lima kanhi commissioner sa Commission on Human Rights ug nahimong DOJ Secretary ug karon siya maoy pangulo sa Senate Committee on Justice mao nangutingkay gyud ang senadora.

 Samtang si Duterte pangulo sa nasud, ug iyang kaakohan nga pahibaw-on ang katawhan sa mga nanghitabo sa nasud ug paghimo og mga pamaagi aron panalipdan ang nasud gikan sa mga hulga, naglakip niini kining problema sa ilegal nga drugas.

Natural nga ihimakak ni De Lima ang mga pasangil kaniya nga nagdawatan siya og kuwarta gikan sa illegal drugs kay salikwaot kaayo nga siya tigpanalipod sa hustisya apan mao na man hinuon ang niyatak niini kun tinuod man ang pasangil batok kaniya.

Ang nakaparat gud niini kay pulos pa lang akusasyon ang nadungog sa katawhan apan wala pay kasong napasaka ni bisan kinsa, bisan og daghan na ang mga gilambigit nga pangalan.

Nagpasad ang mga pagsaway diha sa social media apan wa’y maayong pagtulon-ang nakuha ang mga netizens, kun dili, pulos na lang kasilag.

Nagkadako ug nagkalawom ang samad sa relasyon nila ni De Lima ug Duterte. Haom kaayo ang giingon sa balita nga “killing me softly” ang agian sa senadora nga karon apil na sa gipuntariya sa kampanya batok ilegal nga drugas. Hangtud nga dili mahunong kining binayloay og akusasyon, daghan pang maugkat nga mga baho nga dugay na nga gitago sa mata sa publiko.