EDITORYAL - Ilegal nga sugal gipasagdan ra

Ang ilegal nga sugal kalapasan kini sa Presidential Decree 1602 apan makita nga gipasagdan ra kini karon sa mga polis, dili lang dinhi sa dakbayan sa Sugbo, kun dili, bisan na diha sa kalungsoran.

Kun walay labot si Police Regional Office-7 director Noli Taliño sa pagyugpos sa mga polis sa mikuyanap nga ilegal nga sugal, angay niya nga mandoan ang kapolisan nga molusad kini og kampanya. Dili kita angay’ng motuo nga mahadlok sila sa mga tigpasiugda sa ilegal nga masiao swertres abi kay ang kadaghanan niini gidumala sa lumad nga taga dakbayan sa Davao.

Mas makapanglingu-lingo kita sa mga report nga ang kapolisan nasubornohan na sa mga tigpasiugda sa ilegal nga sugal mao nga nagkyogpos lang sila ug wala magtagad sa problema.

Mga nagpakabana nga katawhan sa kabarangayan, ilabi na dinhi sa dakbayan sa Sugbo, kanunay’ng mo-report sa media kabahin sa ilegal nga sugal sa tagsa-tagsa nila ka dapit nga wala lang tagda sa mga polis.

Bisan ang ubang opisyal sa barangay gituohan gani nga protektor sa ilegal nga sugal, sama sa masiao swertres ug video karera, kay ang maong mga ilegal nga sugalan anaa mismo nag-operate duol sa ilang mga barangay hall.

Angay usab nga ang mayor molusad og kampanya batok sa ilegal nga sugal kay tungod sa pagdagsang sa mga sugalan, kadtong mga tawo nga mahutdan na og kuwarta nga isugal, mahimong modangop na sa pagpangawat.

Mas nindot gyud nga kun ang kagamhanan mohingusog sa kampanya batok sa gidiling drugas, kampanyahan usab niini ang ilegal nga sugal.

Daghan hinoon ang nakapanglantaw nga ang administrasyon ni Presidente Duterte dili ganahan nga mohimo’g kampanya batok sa ilegal nga sugal kay didto sa Davao City wala man kuno mahunong ang mga sugal.