Mahimo ba nga bakwion ang resignation?
Dear Atty. Divine,
Nagtrabaho ko sa usa ka kompaniya ug nag-submit na ako og resignation letter last month. Moepekto ang akong resignation karong katapusan sa buwan apan wala pa ako makadawat og approval gikan sa among employer.
Nausab ang akong hunahuna ug nakahukom ko nga dili na lang mo-resign. Mangutana ko attorney kun mahimo ba nga bakwion nako ang akong resignation? Unsay angay nako nga buhaton? Daghang salamat — Jennifer
Dear Jennifer,
Base sa atong Labor Code sa Article 285, ang empleyado mahimo nga mo-resign sa iyang trabaho bisan kun wala kini igong rason, provided, nga mohatag kini og dili mominus 30 ka adlaw nga notisya sa iyang employer aron siya dili mahimong liable for damages.
Apan kun ang empleyado naka-submit na og resignation ug gidawat na sa employer ang iyang resignation letter, dili na kini mahimong bakwion pa sa empleyado ang maong resignation, gawas lang kun mosugot ang employer ug ibalik siya sa puwesto.
Ang Korte Suprema aduna nay gipagawas nga desisyon kalabot niini sa Philippines Today, Inc. vs. National Labor Relations Commission (G.R. No. 112965, January 30, 1997) ug kini nagkanayon :
“The court ruled against the employee. It held that resignations, once accepted, may not be withdrawn without the consent of the employer. If the employer accepts the withdrawal, the employee retains his job. If the employer does not, the employee cannot claim illegal dismissal.”
Busa ang maayo nimo nga buhaton karon mao ang pagpakigsulti sa imong employer kun mahimo ba nga bakwion nimo ang imong resignation ug mopadayon ka sa pagtrabaho sa maong kompaniya. Thanks and God Bless! -Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest