Disiplina sa kadalanan

Gawas sa nagkadaghan na nga mga sakyanan sa kadalanan, usa sa mga hinungdan sa paghuot sa dagan sa trapiko mao ang ka walay disiplina sa mga motorista, pedestrian, mga pasahero ug bisan sa mga traffic enforcer.

Samtang nagkahuot ang mga agianan tungod sa nagkadaghan nga sakyanan, nag-anam usab ka walay disiplina, kainit sa ulo ug kaabusado ang ubang mga motorista ug ang publiko.

Haguka ug luya usab ang pagpatuman sa mga lagda sa trapiko. Usa sa mga kongkretong ehemplo sa kalugak ug siguro wala masabti nga lagda mao ang pedestrian lane. Sa pulong nga pedestrian lane nagpasabot kini nga gitagana ang maong espasyo alang sa mga molabang.

Apan unsay kasagarang mahitabo?, dili hatagan sa higayon sa mga motorista ang mga lumalabang nga makatarong sa pagtabok sa dalan. Kun dili man sirbatohan og kusog, singgitan ug balikason pa ang mga molabang. Bisan kun nakita na sa mga motorista ang nilabang nga pedestrian, makiglumba pa hinoon.

Mura ba sila og mahadlok nga mailogan sa dalan ug mopasutoy hinoon sa pagpadagan. Ang kataw-anan, aduna pay pipila sa mga motorista nga wala makasabot unsa nang pulong Pedxing sa karatola nga makit-ang gibitay daplin sa dalan, ilabi na sa mga dagkong highway. Aduna pay mangutana kun ininsik ba ang maong pulong.

Mahibulong pa sila nganong daghan kaayo kini diha sa kadalanan. Sa mga edukadong motorista, kun matungod na gani sa pedestrian lane mohunong ka ug hatagan sa higayon ang usa ka pedestrian nga makalabang.

Bisan kun siya nag-inusara kinahanglan nga imo gihapon siya nga unahon sa pagpalabang nga dili siya mameligro. Kinahanglan usab sa mga motorista nga mohatag distansya ug dili kinahanglang motungtong sa linya sa pedestrian lane sa paghunong.

Dinhi sa ato, bisan sa mga gagmay’ng dalan nga may mga pedestrian lane, tagsa ka ra nga makakita og mga motorista nga motuman sa maong lagda. Ang nakasalikwaot mao nga adunay mga traffic enforcer nga makakita sa klarong kalapasan, apan wa sila’y gihimong pagdisiplina sa nakalapas nga motorista.

Igo ra silang motan-aw. Tinuod, mopahimutang sila sa mga pedestrian nga makalabang apan ang pag-edukar sa mga motorista sa katuyoan sa pedestrian lane wala nila gihimo. Busa ang mahitabo, kun walay traffic enforcer, mag-inilogay ang mga motorista ug mga molabang pag-agi sa pedestrian lane.

Gawas niini, gitugot usab sa mga traffic enforcer nga alihan sa mga motorista ang mga eskina ilabi na kun maghuot na ang dagan sa trapiko. Inay hatagan og espasyo ang ubang motorista nga makadali-dali sa pagsulod o gawas sa mga eskina matanggong na hinoon tungod kay gialihan ang ilang agianan. Ang mga traffic enforcer manghinan-aw lang ug dili gyud mobadlong.

Laing ehemplo sa wala matarong nga pagpatuman sa lagda mao ang  pagpataka og parking. Taliwa sa usa ka busy nga agianan, gitugtan gihapon ang pagparada sa mga sakyanan. Mag-double parking pa ang uban. Wala usab hingpit nga gipatuman ang parking bay sa mga establisemento.

Gihimo sab nga terminal sa mga PUJ ang mga jeepney stop. Kasab-an pa sa driver ang mga pasahero nga mopadali kanila sa pagpalarga. Samtang ang mga skywalk nga agianan unta sa mga molabang gihimo ra nga dayandayan.

Hinaot nga usa ni sa hatagan og igong konsiderasyon nga mausab, pinaagi sa mga eksperto nga nagtuon pagsulbad sa nagkagrabeng problema sa trapiko dinhi sa Sugbo, sa kaulohan ug ubang bahin sa nasud nga nagkalambo.