Ninja cops

Wa ko’y hunong sa pag-update sa mga balita kada adlaw. Ang gikuhaan ko og source sa mga balita, mga newspapers ug TV news. Dinhi nako mahibaw-i nga aduna diay “floating shabu lab” sulod sa usa ka barko diin adto didto iproseso ang pagluto sa shabu, unya kuhaon kini’g mga pumpboat ug dad-on sa lainlaing probinsiya.

Di na man gud sila maka-operate sa mamala. Pero tungod sa “highly technical intelligence monitoring system” sa kagamhanan, natultolan ra gihapon ang maong laboratory. Kun wala pa ni matultoli, sus kadaghan pa kahang mga batan-on nga mabiktima niini.

Mao diay nga dili mahurot kining shabu kay i-recycle man diay kini niining gitawag ni PNP Chief, Ronald (Bato) De la Rosa og mga “ninja cops.” Karon nga mimando na ang hepe sa PNP nga ipasunog ang tanang nadakpan nga shabu ug uban pang illegal drugs, di na ni makatuyok-tuyok aron masuyop sa kabatan-onan.

Salamat. Hinaut pud unta nga ang tanang shabu nga nadakpan nga nagbalor og minilyon dinhi sa Region VII, hutdon sab og sunog aron di na maka-recycle niining mga “ninja cops” karon mura’g motuo na ko nga mawagtang na gyud sa dili madugay kining illegal drug business, kay wa pa gani makaabot og usa ka gatos ka adlaw sukad sa paglingkod ni Duterte.

Kun di pa si Digong Duterte ang napili nga presidente, ang gatosan nga nangamatay dako pa untang mga buhi karon. Busa kadtong gustong magbag-o, paningkamot gyud mo nga makasukol kamo sa tintal niining kalan-on sa mga demonyo.

Sulay kuno mo’g pangayo og tabang sa Ginoo kun tinuod gyud mong mag-usab sa inyong kinabuhi ug magbag-o, tabangan lagi mo. Si satanas ra man gud inyong giilang amo.

Kun mobalik mo niining bisyoha, mosamot pa kadaghan ang mangamatay kay gisakyan kini niining mga “vigilantes” nga bisag patay na mo,  pakaulawan pa gyud mo pinaagi sa pagsab-ong og karton sa inyong liog unya sulatan og “Huwag ninyo akong tularan, pusher ako.”

Niadtong miaging pista sa among barangay, dihay nagbutang og bingohan. Ang bolador sa maong bingohan may pagka komedyante,  paghulog niya sa bola sa tambiolo, didto tugdon sa letrang  O.

“Mga igsoon, ang bola nahulog sa letrang “O” katapusang letra sa impiyerno tan-awa ninyo kay dia na ang inyong amo nga nagdala og shabu.” Dihay namusta nga batan-on nga nagduka kay mura’g bag-o pang nakasuyop, mikalit lang og isa sa iyang kamot, unya nisinggit ... Bingo!!!