Lahi ang SONA ni Digong

MANILA — Ang State of the Nation Address ni Presidente Rodrigo Duterte niadtong Lunes sa hapon lahi kaayo ikomparar sa mga SONA sa nangagi nga mga presidente.

Walay bulatik ug gikan mismo sa iyang hunahuna ug kasingkasing.

Siyempre, kay una man niya nga SONA, napuno sa saad ang iyang gihimo. Apan daghan sa iyang gisaad ang gipangsugdan na sa paghimo, sama sa kampanya batok sa kriminalidad nga mitumba na og daghang mga personalidad nga nalambigit sa ginadiling drugas.

Gikan sa kasingkasing, kay kun sa tungatunga sa gibasa niya nga speech, mo-adlib siya ug mo-estorya unsay naa sa iyang hunahuna. Dili sama sa ubang mga presidente nga gisaway kaniadtong magsige lang og batbat og “motherhood statement” nga puno sa bulakbulak.

Sumala pa ni Martin Andanar, ang labaw sa Presidential Communications Operations Office, nga mokabat og 30 minutos ang SONA sa presidente, apan sa aktuwal, miabot kini og usa ug tunga sa oras. Tungod kini kay gusto ni Duterte isulti ang mga polisiya nga gusto niyang ipatuman.

Kining speech sa presidente ug sa uban pa’ng tag-as nga opisyal, sama sa mga kalihim, magsilbe kini nga policy statement  sa magbatbat niini. Busa, kinahanglang walay bulatik. Adunay uban nga ang kahaw-ang sa speech daogon lang sa bulak-bulak, ug ang uban magkomedya na lang.

Apan ang kang Duterte lahi kay walay bulakbulak. Bisan tag-as siya og adlib unya usahay maglisod na og balik sa gipreparar ug gibasa niya nga speech, maninguha gyud siya nga maklaro sa katawhan unsay gusto niyang mahitabo sulod sa unom ka tuig niyang pamunoan.

Nalipay ko nga naapil gyud ang Cebu sa SONA ni Duterte. Gusto niya nga mapadali ang Cebu Transit System. Gihisgutan usab ni Duterte ang planong paghatag kaniya og emergency powers aron sulbaron ang trapiko, ilabi na sa Metro Manila.

Subay niini, si Presidential Assistant for the Visayas Mike Dino miduso nga maapil sa emergency powers ang Metro Cebu tungod sa nagkahuot na nga trapiko sa Sugbo.

Giklaro hinuon ni Dino ngadto sa media nga mahimo man masulbad ang trapiko bisan walay emergency powers, apan dugay.

Hinaot nga suportahan sa mga lokal nga kagamhanan ang tinguhang mga pamaagi pagsulbad sa trapiko sa Sugbo. Lain nakong paninguha nga mokooperar si Mayor Tomas Osmeña sa maong tinguha tungod kay kritikal nga lugar ang Sugbo kun hisgutan na ang trapiko.

Gitinguha usab ni Duterte nga mapatas-an ang “expenditure spending” sa mga proyektong inprastraktura sa kalungsoran. Kun matuman kini, molambo ang kalungsoran ug daghan nang negosyo ang mabuksan ug mohatag og trabaho sa katawhan.

Ang labing nindot nga buhat sa administrasyong Duterte mao ang kampanya batok ilegal nga drugas. Nagpaabot ang mga tawo nga mopa-“boto og bomba” si Duterte sa iyang SONA. Apan nagtuo ko hilom na niyang ipadayon ang pagtumba sa mga nalambigit sa drugas.