Makadudang petisyon batok sa curfew

Kadudahan ang intensiyon sa grupo sa aktibistang mga batan-on pagkuwestiyon sa curfew isip tipik sa programa sa kahusay ug kalinaw ni Presidente Rodrigo Duterte.

Ang Samahan ng Progresibong Kabataan o SPARK misang-at og petisyon sa Korte Suprema aron ipaundang ang curfew sa mga lugar sa Metro Manila. Kay matud nila "abuso sa gahom sa mga lokal nga kagamhanan" ang pagpatuman sa curfew.

Nganong abuso man sa gahom? Kun adunay ordinansa nga nagpatuman sa curfew, wala koy nakita nga abuso sa gahum sa mga lokal nga opisyal.

Sumala pa sa petisyon sa SPARK, daghan sa kabataan ang nabiktima sa "arbitrary and discriminatory enforcement" sa ordinansa sa curfew. Dugang niini, ang mga ordinansa matud nila babag sa lehitimong mga kalihukan sa kabatan-onan nga maatol sa curfew.

Ug ang maong ordinansa nakababag sa batakang katungod sa mga ginikanan pagmatuto sa ilang mga anak.  Sa wala pa manumpa si Duterte isip presidente sa nasud niadtong Hunyo 30 sa udto, daghan nang mga operasyon ang napatuman sa nagkalainlaing lugar sa Metro Manila nga miresulta sa pagkasakmit sa mga bata nga nagsuroysuroy sa kadalanan.

Sa mga programa ni Duterte, ilabi na kanang gitumong sa kahusay ug kalinaw ug kampanya batok ilegal nga drugas, suportado kini sa kinabag-ang Pilipinhon.

Ebidensiya niini mao ang kinatas-an niyang trust rating base sa survey nga 91 porsiyento, rating nga wala pay presidente nga nakakuha.

Busa, nagtuo ko nga ibasura lamang kining maong petisyon. Ang giingon nila nga "arbitrary and discriminatory enforcement" dili kana tinuyoan sa mga polis ug mga tanod. Kay apil sa ipahipos pinaagi sa curfew mao ang mga batang naglatagaw sa kadalanan bisan lawom nang gabii.

Unya'g sipongon kining mga bata managan, manukol, manghilak, ug mangligid daw biktima sa binulilyaso nga operasyon, ilabi na kun adunay TV media nga nag-cover.

Kun apil sa lalis ang lehitimong aktibidades sa kabataan, mahimo ra gyud kini nga i-exempt, ilabi na kun ang ilang kalihukan mahitungod sa simbahan, barangay, isports, o eskuylahan.

Apan kun moingon ang SPARK nga mobabag kini sa batakang katungod sa mga ginikanan pagmatuto sa ilang mga anak, dili gyud ko mosakay niini.

Ang curfew makatabang namong mga ginikanan pagsipong sa among mga anak aron kami magkahiusa sulod sa balay atol sa oras sa tingkatulog.

Wala ba kaha paluyohi sa mga negosyante og bar, imnanan, ug mga balay kahilayan kining petisyon sa SPARK batok sa curfew?

Dili ba sila man ug ang ilang negosyo maoy unang maapektahan niining curfew?

Nianang mga negosyoha, makit-an nimo ang tinuod nga mga biktima - ang mga minor de edad nga nanagserbisyo na isip mga masahista, mga nagbaligya sa dungog, waitress ug uban pa.