Kinsa’y protektor?

Wala tuod mahibulong si President-elect Rodrigo Duterte nganong dali nga nakaaksiyon ang mga sakop sa Philippine National Police batok sa mga druglords bisan wala pa siya’y awtoridad pagsugo kanila kay sa udtong tutok pa sa Hunyo 30 siya manumpa pagkapresidente, apan sa miagi lang semana nasakpan nganong dali nga nakalihok ang kapolisan batok sa mga druglords.

Sa dihang gitumba si Jaguar Diaz sa kapolisan sa rehiyon, mitumaw ang mga pagduda sa publiko nga gipatay kini kay nagpreparar na nga motahan sa kaugalingon ug nahadlok ang kapolisan nga mokanta kini ug hinganlan ang kapolisan nga nagproteksiyon kaniya ug sa iyang negosyo.

Dali kaayo nakagamit para sa PR si Mayor-elect Tomas Osmeña sa takna sa pagkamatay ni Jaguar didto sa Las Piñas kay siya’y nag-una-una sa Facebook sa pagpahibalo nga natumba na ang druglord nga taga-Duljo ug nga gipanghambog niya ang duha ka dagkong opisyal nga maoy nangunay sa pagbira niini.

Apan wala damha sa umaabot mayor sa siyudad nga moani og pagsaway ang nahitabo ni Jaguar. Ang mga Facebook users misaway nganong gidalidali kini pagpatay nga paingon man unta kining mosurender ug motug-an kinsa ang iyang mga protektor. Tayming nga niadtong Lunes miuban ko sa mga Sugboanong delegado didto sa Davao pagtambong sa duha ka adlaw nga konperensiya alang sa 10-point economic agenda sa umaabot Duterte administration, ug sa samang adlaw nagpagawas og pamahayag si umaabot PNP chief Ronald “Bato” dela Rosa nga kadtong mga opisyal sa kapolisan nga mopatay og druglord aron dili na kini mopiyait kinsa ang mga polis nga nagprotehir niya, iya usab patyon.

Sa ikaduhang adlaw sa konperensiya uban sa mga lider sa mga chamber of commerce lukop nasud, mismo si President-elect Duterte nagduda nganong gipamatay og dalidali ang mga druglord sama ni Jaguar. Matud niya: "Yang mga mayor... pinatay nila mga bata nila para hindi na pumiyait."

Sa ato pa nasayod na si Duterte sa mga estorya nganong gipamatay ang mga druglord. Adunay usa ka kanhi sakop sa Criminal Intelligence and Detection Group-7 nga tua na sa Davao misugilon kanako dihang nagkita kami sa Marco Polo sa Davao nga si Duterte aduna nay lista sa mga opisyal sa polis sa Sugbo nga patyonon tungod sa pagkalambigit sa ilegal nga drugas. Matud pa niya: "Wa nay matago anang Digong, dong. Bisan unsa pa nga klaseng pamakak ilang himuon, nakalista na kana silang unom sa Cebu."

Si Alvaro Alvaro alyas "Barok" nga giingong kuyog ni Jaguar sa dihang girakrakan sa mga polis nakatahan sa mga sakop sa National Bureau of Investigation-7 didto sa Bohol. Wala man lagi patya si Barok sa mga sakop sa NBI-7 nga mas aduna man kini pending nga warrant kay kang Jaguar?

Aber, kinsa man kining mga polis nga protektor ni Jaguar? Atong hagiton si PRO-7 Director Patrocinio Comendador ug si Tomas sa paghingalan nila.