Unta himuon nga prayoridad

Niining paglingkod balik ni Tomas Osmeña isip bag-ong mayor sa dakbayan sa Sugbo, nag-una sa mga butang sa akong listahan nga angay niyang hatagan og prayoridad mao ang paglimpiyo sa dakbayan gikan sa mga nagpuyo sa karsada, ilabina sa mga batang libud-suroy.

 Sa atong makita karon, grabe nga nagkatag kining mga batang lisudsuroy ug ubang street dwellers. Naghatag kini sila og impresyon nga nagkahugaw na hinuon ang imahe ning atong dakbayan gumikan lagi kay morag gipasagdan lamang sila sa lokal nga kagamhanan.

Hinuon daghan ang naglaum nga unahon kini sa pagtagad sa administrasyon unya ni Osmeña. Kaniadtong mayor pa siya sa dakbayan, nakontrol kaayo ang pagkatap niining mga street people. Talagsa ra nato makita nga adunay mga libudsuroy sa kadalanan, ilabina matag gabii.

Kahinumdom ko kaniadto nga aduna pay nag-monitor ug naghipos sa mga minor de edad nga maglatagaw sa uptown area. Mao nang talagsa ray reklamo sa mga bisita kaniadto nga gibiktima sa mga rugby boys.

Apan karon grabe na ang pagkatap niining mga kabataang libudsuroy. Matag gabii paborito nilang tambayan ang uptown area. Kini tungod lagi kay daghang mga turista sa maong dapit nga dali ra nilang mabiktima.

Gani normal na ang mga insidente nga naglambigit sa mga batang libudsuroy kinsa nanguot o nangilad og mga turista. Alarming na kining klase sa mga panghitabo nga naghatag og dakong buling sa industriya sa turismo sa dakbayan.

Ang pagpabaya sa dakbayan sa mga naglatagaw nga mga bata ug mga street dwellers mao ang usa sa akong gikayam-iran sa administrasyon ni Mayor Michael Rama tungod sa kakulang sa iyang kagamhanan pag-aksiyon niini.

Sa pipila ka tuig ni Rama sa City Hall, wala ko kakita og konkreto nga programa nga nagtabang niadtong anaa nagpuyo sa karsada. Anaa tuod ang balik probinsiya program sa dakbayan. Apan ambot ngano nga wala kini gipatuman pag-ayo.

Ug niining umaabot nga administrasyon ni Osmeña, daghan ang nanghinaut nga mahipos na kining mga batang libudsuroy. Kay kun dili masulbad kining maong problema, kinsa pa may turista nga ganahan mobisita sa dakbayan?