Hadlok si Duterte

Daghan ang nag-atang sa panag-abot unta nila ni Mayor Rodrigo Duterte ug Senador Antonio Trillanes IV didto sa usa sa mga sanga sa BPI sa kaulohan aron utingkayon kun tinuod ba nga si Duterte may P211 milyones nga deposito nga wa niya itug-an.

Apan wala motunga si Duterte ug gipadala ra niya ang iyang abogado aron maoy moatubang sa senador. Inay kay magdala sa specific waiver nga magpautingkay sa iyang mga deposito sa BPI, nagdala lang ang abogado ni Duterte og special power of attorney.

Ang mayor namahayag nga dili siya mokubit sa paon sa senador. Gikwestyon ni Duterte ang Bangko Sentral ng Pilipinas ug Anti-Money Laundering Council kay nakakuha og kasayoran si Trillanes sa iyang account sa BPI.

Kun imong basehan ang pamahayag sa mayor, wala na niya ipanghimakak ang iyang deposito sa BPI, sukwahi sa una niyang pamahayag nga kuno hinimo-himo lang kini ni Trillanes ug peke ang giingong account sa BPI.

Ang pag-angkon gihimo kay nahibaw-an na ang pagpamakak ni Duterte kay sa dihang gidepositohan og P500 ang account, gidawat kini ug mihatag pa og resibo nga nakapangalan sa mayor. Apil na ang iyang dollar account nga iyang giingon nga wala siya niini.

Ibutang ta nga dili tinuod nga miabot sa P211 milyones ang nadeposito sa BPI account ni Duterte, ngano nga nagdumili man siya sa pagpaabli niini?

Nganong daghan pa man siya og sulti? Dili ba normal man sa tawo nga kun wala siya maghimo sa gipasangil batok kaniya ablihan niya og dako ang iyang pultahan aron pasudlon ang namasangil ug pamatud-an ang sayop niining gituohan?

Nganong dili man kini ang gihimo sa mayor? Nahadlok ba si Duterte nga moalisngaw ang iyang dili maayong mga binuhatan?

Tambag nako kang Duterte nga buksi ang imong mga account sa bangko aron mawagtang ang pagduda sa katawhan. Ipakita ning tungora nga ang imong kaisog dili lang kutob sa uban, kun dili, mahimo usab nimo kini batok kanimo. Ayaw na lang pagdaghan og kyawkyaw diha mayor kay basin unya og daghan na ang magduda kanimo.