EDITORIAL - Kontraktuwal ipahunong

Klaro kaayo sa panagway sa mga mamumuo nga sila masub-anon bisan og gisaulog unta sa nasud ang Labor Day kagahapong adlawa. Kadaghanan sa mga trabahador miangkon nga kuwang ra gyud ang P353 nga maoy minimum nga sweldo matag adlaw dinhi sa Metro Cebu.

Sa ubang mga dapit, mas barato pa gyud ang sweldo nga unta susama ra man ang prisyo sa palaliton. Swerte lang kadtong mga kawani nga sakop og unyon sa pamuo kay nakaangkon sila og sweldo nga mas labaw kay sa gilatid nga minimum wage. Ang mga nagtrabaho sa lainlaing department stores ug ubang kompaniya, mireklamo kay nagpabilin sila nga “contractual workers” ug kutob ra sa lima ka buwan ang ilang pagtrabaho aron dili gayud sila mahimong regular.

Gihangop sa mga mamumuo ang pasalig ni Kongresista Martin Romualdez nga kun siya modaog pagka senador, ipa-revoke niya ang balaod nga nagtugot og contractualization ingon man misaad nga ipapriso niya ang mga agawon nga moabuso sa mga trabahador.

Bisan ang Associated Labor Unions-Trade Union Congress of the Philippines (ALU-TUCP) misuporta sa tinguha ni Romualdez sa pagpapas sa balaod nga nagtugot og contractualization kay maisip kini nga pagpangabuso sa katungod sa mga mamumuo.      

May basehanan ang baruganan sa mga agawon nga kun palab-anan usab ang pagpataas sa sweldo sa mga mamumuo, magkahulogan usab kini og dakong alkanse sa ilang negosyo ug hayan manirado na lang usab sila sa ilang kompaniya.

Kinahanglan gyud tuod nga ang mga agawon makaangkon usab og ginansya sa ilang negosyo, apan wala usab kini magpasabot nga pahimudsan na lang usab nila pag-ayo ang mga mamumuo pinaagi sa dili paghatag kanila og tukma nga sweldo.

Samtang gamay ra ang gilatid nga minimum wage nga tag P353 ang adlaw, samot na kun ang mga trabahador magpabilin lang nga contractual workers hangtud sa hangtud.