Gimok sa beef loaf

Tungod sa ka busy sa mga tawo karon, kinahanglan nga mag stock gyud og mga pagkaon nga dali ra andamon. Kini sama sa canned food nga igo lang initon, gani ang uban deritsuhon na man lang og kaon inig habwa gikan sa lata.

Apan usa ka konsumidor ang nireklamo diha nga hapit niya makaon ug sa iyang pamilya ang beef loaf nga kontaminado na sa kagaw kay pag-abli pa lang niya sa de lata, naglumbaanay sa paggimok ang mga ulod.

Wala siya magdahom nga ingon niadto ang iyang masinati sanglit nakatatak man nga sa Enero 2019 pa mo-expire ug sa grocery nga nahimutang sulod sa dako nga mall niya napalit ang beef loaf.

Gipadayag sa health department nga posibleng kontaminado sa kagaw nga clostridium botulinum ang beef loaf nga peligro sa pagkahilo sa mga makakaon niini.

Midangop ang konsumidor sa Food and Drugs Administration apan gibalibaran tungod kay walay labot sa ilang hurisdiksyon ang mga canned foods.

Gipasa ang reklamante sa National Meat Inspection Service apan gibalibaran gihapon hangtod nakaabot sila sa Department of Veterinary Medicine and Fisheries nga maoy miaksyon sa reklamo pinaagi sa pagpa- recall sa ka-batch nga mga produkto.

Maayo gani kay nagpursige ang reklamante nga ipadayon ang iyang reklamo bisan sa dako niyang kadismaya sa ahensya nga gituohan nga maoy moasikaso kay nagtangag man lagi sa pulong nga "Food."

Makapakugang bitaw kay pinili lang diay nga pagkaon ang ilang atimanon. Mas maayo nga tawgon na lang sila ug “S-FDA” o Selected-Food and Drugs Administration.

Hinuon dili pud kita kapugos nila kay igo kuno sila nga nagtamod kun unsa ang nalatid sa ilang function.