Pangampanya sa mga politiko

Karon ang ikatulong adlaw sa opisyal na nga pagpangampanya sa nasudnong mga kandidato sa pagka-presidente, bise-presidente, senador ug party list.

Apan kitang tanan nasayod nga bisan wala pay election period, silang tanan, apil na ang lokal nga mga kandidato nagsugod na sa pagpangampanya sa ilang tagsa-tagsa ug hilom nga mga pamaagi.

Dili gani sila kinahanglan nga magtago-tago sa pagpangampanya tungod kay dili man gihapon sila mabadlong ug madisiplina sa Commission on Elections.

Wala’y klaro nga lagda ang Comelec nga nagdili sa early campaigning. Karon lang nga campaign period na makapanghilabot ang Comelec, kana kun ilang maato sa pagsusi kun nituman ba ang mga kandidato sa mga lagda.

Kini sama sa sukod sa gidak-on sa mga campaign material nga ilang ipapilit anha sa designated poster areas ug nga dili ilansang sa mga punoan sa kahoy ang mga tarpaulin, streamers ug ubang campaign materials sa kandidato.

Pipila ra kini sa daghang lagda sa Comelec karong campaign period nga kanunay mataligam-an tungod sa kanihit sa ilang mga personnel nga mag-monitor ug mobadlong sa sipat nga mga supporter sa mga kandidato.

Gani saksi ang kadaghanan kanato nga human sa eleksyon, mangumbitay pa sa mga kahoy ang dagway sa mga napilde ug nidaog nga mga kandidato. Wala na’y mangako sa pagtangtang ug paglimpyo niini tungod kay wala na may kuwarta nga ikabayad ang mga kandidato ilabi nang mga pildero.

Niadtong Martes, sa opisyal na nga pagsugod sa campaign period alang sa mga magpapili sa nasudnong mga posisyon, nag-contest sa pagpahigayon sa ilang proclamation rallies ang mga kandidato sa pagka-presidente.

Si LP standard bearer Mar Roxas ug iyang runningmate nga si kongresista Leni Robredo ug ticket sa administration party didto sa Roxas City, sa Capiz nagpahigayon sa kick off sa ilang mga kampanya.

Niadtong 2010 presidential election, nakuha ni Roxas ang 62 porsiyento nga suporta sa mga botante sa iyang pagdagan isip bise-presidente.

Hinuon, bisan kun nangangkon og kadaugan si Roxas sa iyang bailiwick sanglit dinhi siya natawo, dili kini niya mahimong ikapanghambog tungod kay gamay ra ang mga botante sa Capiz.

Niadtong 2010 elections wala makaabot sa tunga sa milyon ang mga botante sa Capiz.  Apan matud sa tigpamaba sa LP nga si Marikina representative Miro Quimbo, ilang gipili ang Capiz tungod kay gawas nga kini lungsod ni Roxas, napakita sab sa maong lungsod ang kalamboan niini nga giduso sa administrasyong Aquino.

Ang Poe-Escudero tandem uban sa ilang Team Galing at Puso senatorial slate nilusad sab sa ilang pagpangampanya sa Plaza Miranda, sa Quiapo.

Sila si bise-presidente Jejomar Binay ug runningmate nga si Senador Gringo Honasan ug senatorial slate sa United Nationalist Alliance (UNA), didto sa Mandaluyong.

Ang Santiago-Marcos tandem sa Batac, Ilocos Norte ug sila si Davao City mayor Rodrigo Duterte ug runningmate senador Alan Peter Cayetano sa Tondo, Manila.

Giingong kasagaran sa mga nagpuyo sa Tondo mga langyaw gikan sa Visayas ug Mindanao.  Karong nakabuylo na ang pagpangampanya, makapaabot kita sa mas alegre nga mga campaign strategy sa mga kandidato ug ang ilang grabeng sinabligay og lapok.

Atong panghinauton nga dili maliban sa kalingawan ang mayoriya sa mga botante ug makalimtan ang tinuod nga katuyoan sa ilang pagpapili.