Husay sa lalis sa plite
May sugyot kong sulbad sa gikabalak-an nga problema sa panaglalis na sab sa mga pasahero ug mga drayber sa public utility jeepneys (PUJs) nga di magkasabot sa linaslasan nga minimum nga plitehan sa unang lima ka kilometro: P6.50 sa kasarangang mga pasahero ug P5.20 alang sa senior citizens ug persons with disabilities (PWDs).
Mangahas ko pagsugyot nga magda ang mga pasahero og mga sensiyo o mag-andam nang daan sa tukmang plite sa ilang pagpanakay sa PUJs. Mao ni akong nahunahunaan nga labing makiangayong paagi sa pagpatuman sa mas ubos nga plitehan nga hingpit nga kalikayan ang wa kinahanglana nga lalis tali sa mga pasahero ug mga drayber.
* * *
Ang pag-andam sa mga pasahero og mga sensiyo makasulbad sa mosunod nga mga suliran:
Kalibog nga nitumaw kun pila ba gyud ang tukmang plitehan tungod sa kapakyas sa Land Transportation Franchising and Regulatory Board (LTFRB) pagluwat og bag-ong taripa (nga segun sa mga lagda wa kinahanglana kay pasiuna pa man ang us-os samtang gituki pa sa LTFRB ang mas permanente nga laslas tungod sa gituohan nga padayong pagbarato sa lana); ug
Pagtago sa mapahimuslanong mga drayber sa ilang mga sensiyo aron nga makalusot nga di makapanukli ug mapugos ang mga pasahero pag-plite og P7, o P6 sa kaso sa senior citizens ug PWDs.
* * *
Tingali, makapangutana ka: Nganong ang mga pasahero man maoy lisudlisuron pagda og mga sensiyo? Unsa na may nahitabo sa gisugyot nga ordinansahon sa Dakbayan sa Sugbo nga magsilot sa PUJ drivers nga mahutdan og sensiyo ug di nang kapanukli sa mga pasahero?
Wa mapasar ang ordinansahon kay kun pugson ang mga drayber pagpundo og mga sensiyo kinahanglan dako ang sudlanan aron makalahutay sa tibuok adlaw nga pamasada, gawas nga maputlan og pila ka oras ang pamasada kay kinahanglan pang mangita ug manghipos og daghang sensiyo nga igong ikapanukli sa gatosan ka pasahero nga magbanus-banos pagsaka-kanaog sa iyang PUJ.
* * *
Mas makiangayon nga ang mga pasahero maoy mag-andam og mga sensiyo kay sila ang nahibawo asa ang ilang mga destinasyon ug pila ang tukmang plite. Makiangayon kining maong sistema nga gipatuman na sa hapit tanang kanasuran sa kalibotan.
Tingali, mangutana ka na sab: Makiangayon ba alang sa mga pasahero nga sila’y magkapuliki og pangita kun magnihit na sang mga sensiyo? Nipasalig ang Bangko Sentral ng Pilipinas (BSP) nga way kanihit sa mga sensiyo. Gawas pa, mas sayon ang pagreklamo ug paghuwat og tiningob nga sulbad gikan sa BSP ug mga bangko (kun simbako magnihit gyud ang mga sensiyo) kay sa pagreklamo batok sa pating ug abusadong PUJ drivers ug operators ug pagpaabot nga aksiyon gikan sa tambok nga burukrasya sa LTFRB ug Land Transportation Office (LTO).
- Latest
