EDITORYAL – Nagustohan apan gikahadlokan

Dili malalis nga daghan ang ganahan ni Davao City Mayor Rodrigo Duterte nga mahimong presidente sa nasud tungod kay isog siya ug dili mahadlok mopatay, ilabi na kadtong nalambigit sa pagpamaligya og gidili nga matang sa drugas.

Apan dili usab ikalalis nga mao kini ang gikahadlokan sa ubang mga tawo nga dili mobotar kaniya kay ang mao nga pamaagi makahatag og dakong peligro kay mahimo man nga butangbutangan ka lang ug patyon ka na dayon.

Bisan gani ang mga abogado nga unta makabaton og daghang kliyente kun daghan ang pamatyon dili mopabor nga patyon lang ang mga tawo nga dili ipaagi sa mga hukmanan.

Gitan-aw nga maayo lang kini kon dili pa kita maoy nahitaboan, apan sakit kini kaayo kon ang atong mga sakop sa pamilya maoy gipatay nga tungod lang kay gikakontra niini ang mga hinanib ni Duterte.

Walay molalis nga didto sa Davao City ang mga tawo malisang gyud nga molapas sa mga balaod kay estrikto kaayo si Duterte ngadto sa mga malapason sa iyang mga lagda.

Bisan ang mga sakop sa media didto sa dakbayan sa Davao giingon nga magpanuko sa paghimo og mga bati nga kumentaryo ngadto ni Duterte kay mahadlok nga masuko kanila ang mayor.

Dili imposible ang panglantaw sa uban nga kun estrikto man ngadto sa mga sakop sa media ang mga sakop sa Presidential Security Group (PSG) sa nangagi nga presidente, apil na ang mga escorts ni Presidente Aquino, labaw na gyud unya kun si Duterte na ang presidente sa nasud.