Brgy Paknaan, Mandaue City
“Wala gihapon mi tauri og linya sa kuryente diri sa Sitio Ahos, magduha na ka tuig. May poste na man unta nga gitaud ang VECO apan wala pa’y alambre. Luoy kaayo ang mga tinun-an nga nag eskuwela kay dili na katuon og klaro.”
Brgy Tipolo, Carcar City
“Grabe ka libaongon ang karsada namo diri, maglibog ka kun asa agi ang motor. Wala man g’yud ni tagda nga problemaha sa among mga opisyal sa barangay ug siyudad.”
Brgy Cogon-Pardo, Cebu City
“Diri sa Sitio Sto. Niño daghan kaayo og namaligya’g butane gas unya daghan na ‘sab ang migamit niini. Kuyaw kaayo kun mosilaob ang butane ug mangasunog mi diri.”
Brgy Kalubihan, Barili, Cebu
“Daghan na ang nasakit og dengue diri sa among dapit tungod sa kadaghang lamok. Kanus-a pa man sila molihok unya na ba kun daghan na ang madala sa ospital?”
Brgy Basak-San Nicolas, Cebu City
“Nindot unta og ipaayo sa mga opisyal ang mga nagbitay nga alambre sa kuryente sa dalan Bontores kay kuyaw kaayo sa mga mangagi, labi na sa mga tawo.”
Brgy Cogon, Cordova, Cebu
“Ang mga dispatcher sa sakyanan diri mura na man og mga tulisan kay bisa’g duha ka pasahero ra ang mosakay sa among PUJ masuko man kun hatagan lang og P2, manghulga pa g’yud.”
Brgy Cayang, Bogo City
“Wala’y pagpakabana sa mga batan-on ang among mga opisyal kay ang basketball court gibutangan man hinoon og stage. Maglisod na hinoon mi pagduwa nga mao ra unta ni kalingawan aron dili na magbisyo sa drugas.”
Brgy Bogo, Argao, Cebu
“Wala man g’yuy agas-agas ang among tinubdan sa tubig diri uy, tulo na ka buwan. Wala man ni atimana sa among mga opisyal sa barangay.”
Brgy Basdiot, Moalboal, Cebu
“Kami ‘sab diri wa’y agas pirmi ang tubig, labi na diri sa Tap-anan dapit. Wala g’yuy nahimo bahin niining problemaha ang among mayor, hapit na lang ang sunod nga election.”
Brgy Caputatan-Norte, Medellin, Cebu
“Guba ang bomba sa among tubig diri. Asa na man diay ang budget para niini nga proyekto. Angay’ng ayuhon ni aron moabot na ang suplay sa tubig ngadto sa mga sitio.”
Brgy Banilad, Mandaue City
“Diri sa Sitio Orel kada Domingo g’yud adunay tigbakay. Nagduda ko nga may nagpaluyo niini kay naa may sakyanan sa gobiyerno (red plate) nga mag-arian ug tulo ka tawo ang sakay, mura’g mga polis.”
Alang sa inyong mga reklamo text lang sa 09062973166 / 09234982747
- Latest
