EDITORYAL - Mo-resign kaha si De Lima?

Karong nahilom na ang mga lihok protesta sa mga sakop sa Iglesia ni Cristo (INC) human sa matud pa 'high level' nga negosasyon tali sa Malacañang ug opisyales sa INC, unsa kaha ang sunod mahitabo?

Daghan ang nagpaabot nga mo-resign si Justice Secretary Leila De Lima kay mao man kuno kini ang kondisyon nga gipangayo sa maong gamhanang pundok.

Apan miinsister ang Malacañang nga dili negosasyon ang nahitabo kay nipatigbabaw kuno ang balaod ug dili ang INC. Mao ba g'yud kaha kini ang nahitabo o may sekreto nga bargain?

Kun sa mosunod nga mga adlaw sa dili pa ang pagpasaka sa certificates of candidacies buhian ni De Lima ang iyang pwesto sa DOJ, makaingon 'ta nga napolitika g'yud ang kaso nga gisang-at sa gitaktak nga opisyal sa INC.

Unsa may naa gud sa pagtutok sa DOJ sa kaso? Ngano nga ingnon man g'yud nga wa tagda ang ubang kaso ug ang kaso sa INC ang giuna sa pagtagad?

Sa pagkatinuod, ang maong kaso batok sa pipila ka ministro sa INC pareho ra man ni sa ordinaryo nga kaso nga gisang-at diha sa DOJ. Ang kalainan lang kay dili ganahan ang INC sa gitawag nila nga espesyal nga atensyon gikan kang De Lima. Duna ba gud?

Ang gipakita nga organisadong paglihok sa INC sa usa ka tumong nagbilin og impresyon pareho sa administrasyon ug sa oposisyon. Mao bitaw nga duna g'yuy mga nangambisyon og puwesto nga nanakay sa isyu.

Kini nga insidente dili unta moresulta og ngil-ad kaayo nga talan-awon nga ang kalihim pa hinuon sa hustisya maoy mahikawan sa iyang baruganan kun unsa ang buot unta nga ipatigbabaw sa maong ahensya.