Libre nga buhis ni Pacman?

Gisugyot ni kanhi Senador Nene Pimentel nga dili kolektahan og buhis si Manny Paquiao sa iyang away batok Floyd Mayweather Jr. unya sa Mayo 2, 2015 didto sa MGM Grand sa Las Vegas, Nevada.

Ang kanhi senador nagkanayon nga angayan lang gayud nga dili kuhaan og buhis ang kitaon ni Pacman isip pag-ila sa iyang natampo nga kaayohan sa nasud. Apan gusto ni Senador Edgardo Angara nga tun-an pa og maayo ang sugyot kay mawagtangan og kita ang gobiyerno.

Ang kagamhanan nanginahanglan og salapi alang sa mga ipatuman nga programa niini maoy hinungdan nga bisan unsa na lang nga matang sa buhis ang nahuna-hunaan niini kolektahon.

Dili ikalimod nga daghan og natampo nga kaayohan si Pacman sa nasud ug nagpatung-patong na ang iyang mga bahandi apan dili pud puwede nga librehon siya sa iyang bayranan nga buhis.

Kun ang mga kabus wala libreha sa pagbayad og buhis, ngano’ng librehon man hinuon si Pacman nga dato ug adunahan?

Ang paghatag og pabor kang Pacman dili patas ug dili makiangayon sa mga kabus nga gikolektahan og buhis bisan sa ka gamay nila og kita kun ikomparar sa kita ni Pacman ni’ng umaabot niya’ng away.

Ang buhis nga gikolekta sa gobiyerno gikan sa mga kabus gamay ra tuod tungod kay gamay ra man usab ang ilang kita pero puwerte na kini’ng dakoa para kanila. Ang sinseyo wala ra kang Pacman pero bililhon na kaayo kini para sa mga kabus.

Kun ako ang pagbut-on, pabayron g’yud og buhis si Pacman sa gobiyerno base sa iyang kitaon sa away nila ni Floyd Mayweather Jr. karong Mayo.