Giilog ang yuta ug gipatitulohan

Dear Atty. Divine,

Duna mi yuta sa Luzon nga pinalit sa akong amahan ug among  gipatukuran og balay niadtong 2009. Patay na ang nagbaligya ug patay na ‘sab ang akong papa. Apan niadto’ng 2012, ang usa sa mga anak sa nagbaligya sa yuta kalit nga nag-interest sa property ug iya kini’ng gipatituluhan ubos sa iyang pangalan. Ang problema kay nawala ang dokumento nga pinirmahan sa nagbaligya pagmatuod nga napalit na ni papa ang maong property. Unsa may maayo namo nga buhaton aron pagbawi sa property? - Salve

Dear Salve,

Kun inyo na’ng gibalayan ang maong yuta nga napalit sa imong amahan, buot ipasabot nga mi-take possession na kamo sa mao nga  property kay napalit na man kini sa inyo’ng amahan. Ang una ninyo’ng buhaton karon mao ang pagpasaka og reklamo batok sa anak sa nagbaligya ngadto sa barangay diin nahimutang ang maong yuta alang sa posible’ng pag-areglo. Apan kun di g’yud mo ma-areglo sa barangay ang sunod ninyo’ng buhaton mao ang pagdangop sa korte aron ipakanselar ang iya’ng titulo ug aron inyo’ng mabawi ang ownership niini. Kun di na g’yud ninyo makita ang kasulatan sa pagbaligya, then mopresentar na lang kamo  og mga testigo ngadto sa korte nga adunay personal knowledge sa pagbaligya aron silay mopamatuod nga napalit na sa imong papa ang maong yuta. Hinaut nga akong natubag ang imong pangutana.

- Atty. Divine

Alang sa inyong pangutana may kalabutan sa problemang legal ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa column matag Miyerkules ug Domingo.