EDITORYAL - Sensiro ba ang MILF?

Nagkadaghan ang panawagan nga ibasura ug dili na lang ihinayon ang Bangsamoro Basic Law sa Mindanao nga mao untay maghingpit sa pagtapos sa kapin upat ka dekadang gubat nga mikalas na og kapin sa 150,000 ka kinabuhi sa mga Filipino.

Nahitabo kini human sa masaker kapin sa kwarenta ka mga sakop sa PNP-Special Action Force atol sa pag-aresto unta nila sa usa sa mga most wanted Jemaah Islamiyah terrorist nga si Zulkifli bin Hir alias Commander Marwan nga usa ka Malaysian.

Sa gihimo sa mga rebeldeng Moro Islamic Liberation Front (MILF) nagsusama na hinuon og gidapigan nila ang teroristang Bangsamoro Islamic Freedom Fighters (BIFF). Gikan mismo sa baba ni MILF chief negotiator Mohaqher Iqbal nga managkabanay lang ang mga sakop sa MILF ug BIFF.

Sa pagporma pa lang sa peace talks, ang MILF mideklarar nga mga “spoilers” o panglawgaw ang BIFF. Misaad pa silang motabang sa pagpuhag sa maong grupo tungod kay sila maoy babag sa paglambo na sa Mindanao.

Wa ba kaha giilad lang nila ang katawhang Filipino sa ilang gibuhat karon?

Sa ato pa, bisan og nakalapas sila sa balaod, bisan sila mga kriminal dili sila lutoson kay paryente sila?

Unsa may kaugmaon sa maporma unya nga Bangsamoro entity sa Mindanao kun ingon niini kawalay pamatasan ug walay pagtahod sa Rule of Law ang mga tawo?

Gani, mangtas kaayo ang uban kanila, kay bisan patay na ug kadtong wala na gani ikasukol pa, gipamusil sa ilang mga nawong, gipangawatan sa ilang personal nga mga gamit. Unsa may makuha nila paghimo niini?

Kung sensiro ug tinud-anay nga may kontrol ang MILF Central Committee sa ilang mga sakop, ang unang maayo nilang buhaton ipang-uli ang tanang gipangkawat nilang mga armas ug gamit sa mga biktimang polis.