EDITORYAL – Buotan kaniadto arogante karon

Daghan na ang nakabantay nga dako na kaayo ang pagkausab sa batasan ni Mayor Michael Rama. Ang buotan nga kanhi konsehal ug bise mayor sa dakbayan sa Sugbo, gihulagway na karon nga arogante na kaayo.

Kun maapekihan kini sa argumento, o kaha aduna siya’y kasuk-an, modayon lang og ingon nga siya maoy mayor ug walay magbuot. Dayon hagiton niya ang tawo nga mokuwestyon sa iyang gihimo nga  palansaron pagka mayor.

Bisan gani ang mga sakop sa media, walay pagduha-duha si Mayor Rama nga mohimo’g arogante nga pamahayag pinaagi sa pagsukna kun kinsa ang mayor sa dakbayan. Angay pa ba gud nga ikapangutana kun kinsa ang mayor.

Angay’ng hinumdoman ni Mayor Rama nga dili tukma ang pagpasigarbo abi kay napili siya nga mayor sa dakbayan. Nabutang siya sa puwesto tungod sa dako nga pagrespeto kaniya sa katawhan ug mihukom nga himuon siya nga ilang lider.

Kun moabot na ang panahon nga kawad-an og respeto kaniya ang katawhan, mahimo nga dili na siya mayor, ug tingali anha pa diha nga mahinuklog siya nga dili diay tukma ang pagkaarogante.

Pananglit adunay mga isyu nga dili magustohan sa mayor kapila ra’y paghatag sa iyang pagpasabot nga dili isaka ang tingog ug dili mohimo’g arogante nga sinultihan.