Politika sa Ebola
Sama sa pipila ka politiko nga nabalaka sa hulga nga makasud sa nasud ang Ebola, labi na tungod sa pagpangabot sa mga Pinoy nga UN Peacekeepers gikan sa Liberia sa niaging semana ug sa gitakdang pagpamakasyon sa gatosan ka Overseas Filipino Workers (OFWs) gikan sa West Africa karong Pasko, ang mga kawani sa Mactan-Cebu International Airport (MCIA) nipadayag sab og kahadlok nga matakdan sila sa makamatay nga kagaw.
Bugtong kalainan mao nga ang mga politiko nisangyaw sa ilang kabalaka. Maong nabantang sa tibuok nasud ug kalibotan ang ilang taphaw nga kasayuran mahitungod sa Ebola. Ang mga kawani sa MCIA igo lang nagpatambag sa ilang kadagkoan.
* * *
Si MCIA General Manager Nigel Paul Villarete maoy giduol di lang sa mga kawani sa tugpahanan kun dili hasta na sa kadagkuan sa Bureau of Immigration (BI) ug Bureau of Customs (BOC) nga maoy labing unang moatubang sa mangabot nga mga pasahero sa flights gikan sa ubang kanasuran.
Nagpatambag silang Villarete kun angay na ba silang magsul-ob og protective gear. Aron nga di matakdan kun may mga pasahero nga natakdan na sa Ebola nga mokalit lang og ubo o atsi sa ilang duol. May sukaranan ang ilang kabalaka tungod sa padayong pag-usbaw sa gidaghanon sa mga pasyente nga natakdan ug nangamatay sa Ebola.
* * *
Gipasabot silang Villarete nga ang pagsul-ob og protective gear makapasamot sa kaalarma sa mga pasahero sa tugpahanan. Samtang masabot nga gusto lang manalipod ang mga kawani sa tugpahanan sa ilang kahimsog, nitataw si Villarete nga peligrong makamugna og dugang kayagaw ug musangpot sa mas dakong kadaut.
Ang pagpaundayon sa way sukaranan nga mga kahadlok di makatabang sa paglusad og epektibong mga panagang batok sa Ebola virus. Mahimong mahugno ang industriya sa turismo ug ang tibuok ekonomiya, nga makahulga sa panginabuhi sa mga kawani sa tugpahanan, bisan sa di pa makatakod ni bisan kinsa ang Ebola dinhi sa atong kaugalingong nataran.
* * *
Nakapait sa mga politiko mao nga wa una sila mangonsulta sa tinuod nga mga eksperto sa Ebola. Sama ni Acting Health Secretary Janette Garin. Nga, inay ilang pangayoan og katin-awan sa iyang pagduaw sa peacekeepers sa Caballo Island, ila na hinuong giawhag nga mag-quarantine sa iyang kaugalingon ug magsul-ob og protective gear sa iyang pag-atubang sa mga senador atol sa pagpanalipod sa budget sa DOH sunod semana.
Mao ni kalainan sa kakuwang og kasayuran natong gagmay ug nilang dagko. Kitang gagmay igo lang moluom, usahay mahinayak og kalagom. Apan silang dagko moduhig sa tibuok nasud ug tanang katawhan sa ilang ka-ignorante. Bisan hatagan na sa tukmang kasayuran, palabihon ang pagpatigbabaw sa garbo tungod sa kadagko sa katungdanan nga ilang gihuptan ug magpaugat lang gihapon sa sayop nilang pagtuo.
- Latest
