Kalampusan batok kriminalidad

Angay lamang nato nga pasidunggan ang kapulisan sa ila’ng malampuson nga operasyon batok sa kriminalidad sa nangagi nga mga adlaw. Nagpasabot lamang kini nga andam gayud ang otoridad pagpuhag niadto’ng mga bugok sa katilingban.

Nagmatngon na karon kini’ng mga kriminal. Gani mas maayo nga manglagiw na sila gikan sa Sugbo. Kini tungod kay gipakusgan karon sa kapulisan ang ila’ng kampanya dinhi sa probinsiya.         

Sa dako’ng operasyon sa otoridad sa nangagi nga mga adlaw, lima ang patay ug daghan ang nasikop sa gituohan nga mga kriminal didto sa mga lungsod sa Dalaguete, Alcoy ug Boljoon.

Nagpakita lamang kini nga dili na magpagoryo-goryo ang kapolisan paggukod niadto’ng mga badlongon sa kalitingban. Ug manghinaut lamang kita nga magpadayon pa ang kalampusan sa otoridad sa ila nga kampanya.

Hagbay ra kuno’ng nanghasi ang mga armadon’ng kriminal didto sa mao’ng mga lungsod. Gani naabot na sa Kapitolyo ang mga reklamo mahitungod sa kalihokan niini’ng mao nga grupo.

Mao nang mimando si Gobernador Hilario Davide III sa kapolisan pag-neutralize sa mao’ng grupo. Tuod man alisto ang otoridad sa ila’ng operasyon batok sa mao nga grupo kansang mga sakop giingon nga mga robber ug gun-for-hire sa mao nga mga dapit.

Ug niini nga kalampusan sa kapolisan, angay usab nato nga pasalamatan ang katawhan sa mao’ng mga lugar gumikan sa ila nga pagtabang. Kay kun wala pa ang ila’ng kooperasyon, hayan pakyas ang otoridad sa ila nga misyon.  

Dako gayud og papel ang katawhan sa kampanya pagpatunhay sa kahusay ug kalinaw sa usa ka lugar. Ang ila nga aktibo’ng pagtabang sa otoridad walay duda nga maoy usa sa makapalambo sa komunidad.

Ang ila nga kooperasyon magdasig usab sa kapolisan pagpakusog pa sa ila’ng kampanya batok niadto’ng mga kriminal. Kay kun igmat ang komunidad batok sa kriminalidad, dili gayud mosaler kadto’ng mga badlongon sa katilingban.

Panghinaut sa mga Sugboanon nga mas molampos pa ang otoridad sa ila’ng kampanya batok sa ilegal nga mga binuhatan. Hinuon dako kini nga sagubangon. Apan pinaagi sa pag-abag sa komunidad, walay duda nga magmadaugon gayud ang krusada.