Natubag ba?

Sulod sa mga baynte minutos, gitubag ni Bise Presidente Jejomar Binay ang mga akusasyon sa kurapsyon nga gipasangil kaniya. Daghan ang nagpaabot ug daghan ang naglaom nga mahatagan og linaw ang iyang habig.

Apan daghan ang nadismaya ug daghan ang mas nagduda unsay iyang papel sa giingong gipaburot nga budget sa pagpatukod sa gitawag nga Makati City Hall building 2.

Apan tunga-tunga sa maong akusasyon, mas sibaw na hinuon karon  ang daghan pa’ng mga giingong dili maesplikar nga katigayonan sa mga Binay.

Bisan kun pila ka dekada ka nga nagserbisyo sa gobiyerno, dili mahimo’ng makaangkon ang usa ka tarong nga politiko sa maong matang sa katigayonan.

Yano ang pamahayag ni Binay atubangan sa media sa miagi’ng semana. Apan sukwahi sa gipaabot nga tubagon unta g’yud niya ang mga pasangil, si Binay wala manubag sa mga pasangil kaniya.

Igo lang siya nipadayag sa unsay iyang habig sa maong akusasyon.  Sama sa naandan nga politiko nga daw “plaka’ng guba,” si Binay maoy bida sa iyang ginikanan nga kabus.

Apan wa’ matubag ni Binay kun giunsa niya sa pagpadato ang iyang kaugalingon gikan sa kabus nga pamilya hangtod nga nahimo’ng Human Rights lawyer ug nahimong mayor sa Makati sulod sa dugay’ng katuigan.

Wa’ matubag ni Binay giunsa sa iyang pamilya nga makaangkon sa giingong gatusan ka ektarya’ng luna, daghang balay, negosyo ug uban pa’ng kabtangan.

Di’ gyud mahimo’ng rason nga pamolitika ning tanan nga gihimo batok sa bise presidente.

Sa usa ka nasud nga nahimo nang pamahaw, paniudto ug panihapon ang pamolitika, kinsa pa bay makaingon nila nga luwas sila sa mga intriga ug akusasyon?

Apan dili rason nga pamolitika lang ning tanan labi pa kun ang nag-akusar gikan mismo sa iyang mga kauban sa politika, sinaligan nga higala ug tawo nga iyang gisaaran nga maoy mosunod sa iyang katungdanan sa Makati?

Di’ mahimo nga ipahid lang sa pamolitika ang binilyon ka pesos nga kuwarta nga angayan niya’ng hatagan og katin-awan kay bisan kun asang anggulo tan-awon, adunay lig-ong pasangil nga mas nagkinahanglan og linaw nga pagpanubag.

Karon pa lang nakadawat na si Binay sa paghimbis sa katawhan sa iyang personalidad.  Maayong timailhan ni sa usa ka nasud kansang mga botante makamao nang moutingkay sa personalidad ug moralidad sa usa ka tawo nga nag-ambisyon nga mahimong lider sa nasud.

Ug hinaot nga sa mga mosunod nga adlaw, dili lang si Binay ang moagi sa ingon niini’ng matang sa imbestigasyon apan ang tanan nga nag-ambisyon nga mahimong lider sa kapin 100 ka milyon ka Filipino.

Email: [email protected] or [email protected]