EDITORYAL – Salamin sa katawhan

Isip mga opisyal ug kawani sa kagamhanan, angay gayud unta nga sila maoy magsilbi nga salamin sa katawhan pinaagi sa dili paghimo og salawayong binuhatan.

Kadto’ng mga nagdumala og mga law enforcement units, magbaton unta sila og kaikog pinaagi sa dili magpahimulos sa higayon nga ang mga sinakmit nga butang dad-on nila sa ilang panimalay.

Dili pa dugay, nabutyag nga ang kulokadidang sa pangulo sa usa ka law enforcement unit buhong kaayo sa mga nukos ug mga mahalong matang sa isda nga gituohan nga kabahin sa ilang nasakmit. Pirmi nga puno ang freezer sa mga isda nga ipahatod kaniya sa opisyal.

Adunay ubang mga polis nga kun makasakmit og daghang shabu, ilang ibanan ang nasakmit nga drugas alang sa ilang “personal interest” ug base  sa mga kasayuran nga ipabaligya ra usab nila ngadto sa ilang mga higalang drug pusher.

Sa paghimo nila niini maisip ra nga ilang gitudloan ang ilang mga sakop sa paghimo og binuang. Kini nga mga isyu ang angay’ng bantayan sa mga sakop sa media aron tabangan nato ang kagamhanan nga mawagtang kining mga badlungon.

Wala malilong nga dunay mga sakop sa media nga kuwang pa og kaisog sa pagbutyag sa kamatuoran sa kahadlok nga sila kasilagan sa mga hingtungdan nga opisyal.

Ang kasaulogan sa Press Freedom Week karong semanaha gilauman nga maghatag na unta og kaisog sa ubang sakop sa media nga dili maayo nga ipatigbabaw nila ang kahadlok ug tapin-an na lang ang pagbutyag sa kamatuoran.