Mapugngan ba ang paglarga

Dear Atty. Divine,

Ang akong bana wala na magsuporta sa among tulo ka anak. Usa siya ka engineer ug mga lima ka tuig na kami niya nga gibiyaan kay wala na siya mouli sukad siya milarga sa abroad. Karong bag-o akong nahibaw- an nga miuli kini sa Pilipinas busa plano nako siya'ng pasakaan og kaso sa korte aron ma-obligar siya sa paghatag og suporta matag buwan sa mga bata. Ang akong pangutana attorney kun mapugngan ba ang iyang pagbalik og larga abroad tungod sa akong kaso nga ipasaka? Nahadlok man gud ko nga mosibat na sab siya. Unsa may maayo nako nga buhaton? Magpaabot ko sa imong tubag pinaagi sa imong column. - Gina

Dear Gina,

Ang kaso nga imong ipasaka sa korte alang sa pagpangayo og financial support sa imong bana alang sa inyong tulo ka anak dili g'yud makapugong kaniya sa paglarga ug pagbalik sa abroad. Kini tungod kay ang nature sa maong kaso dili man criminal case. Ang usa ka tawo mahimo lang mapugngan sa paglarga abroad kun adunay hold departure order nga gi-issue ang korte batok kaniya tungod sa bug-at nga kaso'ng criminal nga iyang giatubang nga pending pa sa korte. Busa ang maayo nimo'ng buhaton karon mao ang pag-file na sa imong Petition sa korte alang sa financial support aron ma-serve na dayon ang summon sa imong bana samtang ania pa siya sa Pilipinas ug mapugos g'yud siya sa pag-atubang niini sa korte ug maobligar siya sa paghatag og binuwan nga sustento sa mga bata. - Atty. Divine

Kun ikaw dunay ipangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.