EDITORYAL - Way katagbawang Filipino

Nagsagol ang reaksyon sa ikalimang State of the Nation Address (SONA) ni Presidente Benigno Aquino III, repleksyon kini nga “di nimo malipay ang tanan.”

Daghang wala mahisguti ang presidente nga maoy gipaabot sa uban sud sa kapin usa ka oras nga SONA.  Apan maisip na ba kini nga walay pulos ang presidente?

Kun tan-awon, ang SONA dili para sa mga nakabenepisyo sa nabuhat sa usa ka presidente,  kondili alang kini niadtong mga tawong wa pa maabot sa bunga sa paningkamot sa naa sa katungdanan aron sila masayod nga duna diay gibuhat ang gobiyerno.

Gipahinungod usab ang SONA sa mga tawong sirado ang mga hunahuna ug pulos lang dautan ang nakita sa gobiyerno.

Apan kinsa man diay presidentiha ang wala sawaya human mag-SONA?  Sa kadaghan sa mga pangulong nanglabay way bisan usa nila ang nakahatag og katagbawan sa mga Filipino.

Dili mabasol ni Aquino ang katawhan sa ilang reaksyon, siya man maoy gitan-aw sa mga Filipino nga magdala kanila sa kaharuhay.

Apan alang sa uban, gusto nila og “instant” kay wa kuno nila mabatyagi ang kausaban sa reporma nga gipatuman ni Aquino.

Makadaghang higayon gibalik-balik ni Aquino ang pulong “tiwala” o pagsalig. Tataw kaayo nga nadutlan siya sa mga pag-atake kaniya ug nanawagan og suporta sa iyang mga programa. 

Hagit nga kinahanglang tarungon pa niya ang pagdumala sa nasud. Kay nakita sa pangulo nga ang mga Filipino “worth fighting for.”