EDITORYAL - Kalisod sa pagsakay sa PUJ

Ang mga opisyal sa kagamhanan, ilabi na g’yud ang mga magbabalaod, angay g’yud unta nga panagsa mosakay sila og pampasahero nga mga sakyanan aron makakita sila og unsa ang angayan nga hatagan og pagtagad.

Dili kay magsige lang sila og sakay sa bugnaw nila nga mga sakyanan nga sagad gipagamit kanila sa kagamhanan. Una, daghan sa mga passenger jeepneys nga nagdagan karon gubaon na ang mga lingkoranan.

Ang ubang PUJ wala na gani kisame nga kun mosipyat ug mapakong ka sa puthaw, sigurado nga mobukol kun dili man masamad ang imong ulo. Ang mga lingkoranan sa uban nga mga PUJ gubaon na, apil ang sandiganan nga sakit na sandigan kay wala nay foam.

Dunay uban nga PUJ, ilabi na ang mga multicab nga dili gayud unta angay nga himuon nga pasaheroan kay mubo kaayo ang atop ug sagad masungko ang ulo sa mga mosakay.

Kini ug daghan pa kaayo nga mga angay’ng himoan og kausaban apan wala lang mabantayi sa atong mga magbabalaod, apil ang mga konsehal, kay wala man sila motilaw sa kapaet sa kahimtang sa mga sumasakay.

Mas nindot g’yud nga ang mga PUJ adunay ilatid nga sukod sa gitas-on sa atop gikan sa sawog aron dili maglisod ang mga pasahero sa pagsakay. Daghan kaayo nga angay’ng himoan og kausaban apan ang mga konsehal wala masayod kun unsay angay ipatuman kay wala man sila makasuway pagsakay og PUJ.