Sinyales sa pagkagun-ob?

Init karon ang mga balita mahitungod sa mga dugoon nga panghitabo sa ubang kanasuran. Bisan asa ka molingi, ang mga estorya sa pamantalaan, radio ug telebisyon sa kagubot didto sa Middle East ug uban pa’ng mga nasud maoy midominar karon.  Didto sa Syria, padayon ang engkwentro tali gobiyerno sa maong nasud ug sa mga rebelde. Sulod na kini sa pipila ka tuig. Gani nagsugod kini sa dihang miulbo ang gitawag nga Arab Spring, ang rebolusyon sa mga katawhan didto sa Arab states kaniadtong 2010.

Didto sa Iraq, halos walay kahumanan ang gubot tali sa mga tribu nga Muslim. Bisan pa man sa interbensiyon sa Estados Unidos sulod sa pipila ka tuig, migrabe hinuon ang sitwasyon sa kahusay ug kalinaw didto.

Human sa pipila ka bulan nga protesta sa katawhan didto sa Ukraine, napalagpot ang ilang presidente didto. Apan kini usab ang hinungdan ngano nga nabuak ang maong nasud karon diin ang pipila ka rehiyon didto gusto motapon sa Russia.  Ang grabe’ng gubat tali sa militar sa Ukraine ug pro-Russian separatist rebels miresulta sa pagkahagsa sa Malaysian Airlines Flight 17. Hangtud karon, walay miangkon kun kinsay responsabli niini, ang military ba o ang mga rebelde.

Didto sa Israel, miulbo na usab ang dakong gubat tali sa Israeli military ug Palestinian Hamas. Kini sa dihang miatake ang mga Israelis gumikan sa gatusan ka mga rocket nga gipaulan sa Hamas sa Israel. Hangtud karon, padayon nga mikalas og gatusan ka kinabuhi ang mao’ng gubot. Apan mora’g wala gyuy kahumanan kini. Gani panahon pa sa Bibliya ang kaguliyang taliwala sa maong duha ka estado.

Hinuon ang subo’ng palandungon mao nga pulos mga sibilyan ang pildi niini’ng mga kaguliyang sa kalibotan karon. Niini’ng kasamtangan nga mga gubot, liboan na ka kinabuhi sa mga sibilyan ang nadamay. Mao gayud kini ang mahitabo panahon sa mga kagubot, bunga sa kaguliyang nga walay  hinungdan ug nga mahimo ra unta’ng sabotan. Kini wala pay labot sa hilabihan ka dako sa mga kabtangan nga mapildi.

Kun ang mga eksperto pa sa Bibliya ang atong pangutan-on, kini’ng mga dugoon nga panghitabo karon sinyales na sa nagkaduol nga pagkagun-ob sa kalibotan. Apan hinaut unta nga layo pa ang ato’ng katapusan.