EDITORYAL - Patas nga pagpatuman

Wala’y kulba si Grace Luardo, hepe sa Cebu City Environmental Sanitation Enforcement Team (CESET), nga mangisyo og citation ticket bisan sa mga opisyal sa dakbayan nga makahimo og salaod.

Una nga nakatilaw sa kaestrikto sa CESET mao si Konsehal Dave Tumulak nga giisyohan og citation ticket kay nasakpan nga nanigarilyo luwan sa sakyanan sa kagamhanan. Multa P2,000.

Ang laing opisyal nga nakatilaw sa estrikto nga pagpatuman ni Luardo sa balaod mao si Konsehal David Suzara sa Barangay Guadalupe nga maoy nagdumala sa committee on environment.

Wala masakpi si Suzara nga nagpataka paglabay og mga basura sa publiko nga lugar apan giisyohan siya og citation ticket ni Luardo kay matud pa pakyas kini pag-awhag sa mga molupyo sa Guadalupe nga dili magpataka og labay sa ilang basura.

Angay’ng saludohan kini’ng kaisog ni Luardo sa pagpatuman sa balaod. Sa miaging semana, giisyohan usab niya og citation ticket ang City Health Department kay mga dagom giapil pagbutang sa ordinaryo nga basura.

Kun ingon niini nga matang ang tanan nga manerbisyo sa kagamhanan sigurado nga mapitol ang mga badlongon sa katilingban.

Maayo unta og dili moabot ang higayon nga abuton og kakapoy si Luardo ilabi na kun aduna’y dako’ng opisyal sa dakbayan nga moawhag kaniya sa paghinay-hinay kay mahadlok nga mangasuko sa mayor ang mga botante.

Dili unta matakdan si Luardo sa laing opisyal sa City Hall nga maayo lang sa sinugdanan isog mopatuman sa balaod.