Abaga sa tawo gitaupan sa kutsilyo
CEBU, Philippines – Gitaupan sa kutsilyo ang abaga sa usa ka tawo dihang gidunggab kini sa wala hiilhing kriminal didto sa dalan C.D. Seno sa barangay Guizo, dakbayan sa Mandaue sa miaging gabii.
Ang biktima mao si Flordelito Martel, 52, minyo, nga taga sitio Tabok sa barangay Maslog, dakbayan sa Danao.
Si PO3 Herber Pelayo sa kapolisan sa Presinto 1 sa Centro Police Station sa dakbayan sa Mandaue mibutyag sa Banat News nga gikan sa Park Mall sa reclamation area sa Mandaue ang biktima.
Samtang nagbarog kini sa daplin sa karsada sa maong dapit kay nagpaabot og traysikad kalit lang mitumaw ang usa ka wala hiilhing lalaki ug sa walay estorya kalit lang giduslak sa dughan ang biktima.
Apan ang biktima nga anad kaayo og lihay-lihay, wala masabak sa dughan apan ang iyang abaga maoy gitaupan sa kutsilyo.
Gihatod dayon sa mga nakasaksi ang biktima ngadto sa Vicente Sotto Memorial Medical Center sa dakbayan sa Sugbo samtang ang kriminal nga dali kaayong nakasibat, gipangita pa karon sa kapolisan. -Romeo T. Limpangog (BANAT NEWS)
- Latest
- Trending