Duha ka 13-anyos gilugos

CEBU, Philippines — Ningreklamo ang 13-anyos nga babaye human giingong gilugos sa barkada sa iyang hinigugma niadtong Biyernes sa buntag.

Hinoon ang suspek nga 19-anyos nga taga Bulacao, Dakbayan sa Talisay ang nasikop sa kapolisan.

Si PO1 Janeatte Marquez sa Talisay City Women and Children’s Desk nibutyag nga ang biktima tinun-an sa pribadong tunghaan.

Sayo pa sa buntag giingong niadto sa 7-Eleven sa Barangay Dumlog ang biktima kuyog sa iyang mga higala ug niinom og ilimnong makahubog.

Didto nag-chat na niya ang suspek kun hain siya dayon gitubag nga moadto sa mall sa Tabunok aron mopalit sa iyang kinahanglanon sa eskwelahan.

Apan sa pag-abot sa biktima giingong gisugat kini sa suspek ug gidala sa panimaye niini ug didto gipahimuslan.

Nitug-an ang biktima sa iyang nadangatan ngadto sa iyang hinigugma dayon ilang gipahibawo ang iyang inahan ug nidangop sa kapolisan.

Pagka-gabii nasikop ang suspek sa mga awtoridad ug gipasakaan og kasong pagpanglugos ug child abuse samtang gitanggong sa bilanggoan.

Samtang laing 13-anyos nga babaye ang giingong gilugos sa iyang ig-agaw sa ilang panimaye sa mao gihapon  nga dakbayan.

Niadtong Domingo sa gabii niabot ang mga higala sa 22-anyos nga suspek ug sila nag-inom og ilimnong makahubog.

Mga alas 11 sa gabii nisulod sa kwarto ang biktima aron matulog human nakainom samtang ang suspek padayon pa sa pag-inom.

Alas 2 sa kaadlawon nakamata ang biktima nga nagpatong na kaniya ang iyang ig-agaw.

Gitukmod sa biktima ang suspek ug nidagan palayo ug niadto sa lain nilang balay  diin ang iyang mga ginikanan nagbantay sa ilang tindahan.

Pagkabuntag pa niya gisumbong sa iyang ginikanan ang nahitabo ug uban sa iyang amahan nidangop sila sa Talisay City Police Station.

Si SPO3 Shidney Taboco sa Women and Children’s Desk nagkanayon nga nakuha gyud ang biktima apan sa resulta sa eksaminasyon negatibo kini.

Ang doktor nipasabot nga aduna gyuy mga kaso nga bisan nahilabtan ang usa ka babaye mabalik kini sa normal tungod sa kadali niini nga maayo.

Si SPO3 Taboco niingon nga ang doktor na unya ang mopasabot ngadto sa korte human nila napasaka ang kaso.

Ang biktima nipadayag nga suod gyud siya sa iyang ig-agaw nga giila na niyang maguwang apan sa iyang gibuhat dili gyud siya makapasaylo niini.  Ang suspek dali ra sab nasikop sa kapolisan.

Ang amahan sa biktima nibutyag nga nisalig ra gyud sila sa suspek tungod kay ila ra man paryente pero sa iyang gibuhat padayon gyud ang ilang kaso.

Ang suspek nipadayag nga wala gyud siya mahinumdum sa iyang nabuhat gumikan sa iyang kahubog. (GMR) (BANAT NEWS)