Nilapas sa liquor ban moagi og due process

CEBU, Philippines — Moagi og due process ang tanan matud pa ni Cebu City Mayor Tomas Osmeña mahitungod sa report nga giingong adunay mga balay patigayon nga wala mituman sa Executive Order niini ilabi ang liquor ban atol sa Sinulog Grand Parade niadtong adlaw’ng Domingo, Enero 21.

Una niini, si Konsehal Dave Tumulak, Chairman sa Committee on Public Order and Safety ug Executive Committee Chairman sa Sinulog 2018 miingon nga dunay mga establisemento wala nituman sa EO.

Apan gibutyag sa mayor nga wala pa siya makadawat og report bahin niini apan gitataw niini nga kun makadawat na siya og impormasyon iyaha kining aksiyonan ug iyang giklaro nga ang tanan mag-agi og due process.

Sigon ni Osmeña ang establisemento dili pasirad-an diha-diha dayon, padad-an nila kini og show cause order ug hatagan og napulo ka adlaw aron paesplikaron.

Ipatuman lang gihapon sa kagamhanan ang liquor ban sa sunod  Sinulog sunod tuig ug mahitungod sa plano nga palapdan kini ang mayor miingon angayan una kining tan-awon.

Wala’y plano si Osmeña nga ipatuman ang liquor ban sa tibuok Cebu City dungan sa pagbutyag nga dili siya supak niining pag-inom sanglit ang iyahang tinguha lang mao ang kahapsay ug kalinaw.

Mapasigarbuhon usab si Osmeña sa resulta sa Sinulog 2018 tungod kay nakita niini nga daghang mga bata ang mitan-aw sa selebrasyon nga mao gyuy iyahang gitinguha nga mahimong child-friendly ang kalihukan.

Nalipay sab kini tungod kay ang mga tawo nga responsable sa Sinulog nakahimo gyud sa ilang trabaho ug nabuhat ang mga instructions nga gihatag kini bisan pa man og wala’y signal tungod sa signal shut down nga gipatuman. (IBM) (BANAT NEWS)