Tomas mohatag og incentive sa city hall employee

CEBU, Philippines — Si Cebu City Mayor Tomas Osmeña nagplano sa paghatag og insentibo sa mga kawani sa Cebu City Hall kinsa nahimong kabahin nga nagmalampuson ang selebrasyon sa Sinulog niadtong Enero 21, adlaw’ng Domingo.

Gibutyag ni 2Osmeña nga gitrabaho nila ang bonus system alang sa mga city hall worker ilabi na sa mga garbage collector nga iyang gihulagway nga “silent heroes” tungod kay wala pa misubang ang kahayag sa adlaw limpiyo na ang tibuok dakbayan.

Ang mga traffic enforcer usab nga maoy nagbantay sa trapiko aron mamenosan ang kahuot sa dagan sa trapiko sa siyudad. Susihon una sa mayor ang panudlanan sa siyudad tungod kay buot niya nga cash ang mahatag ngadto sa mga kawani.

Subay niini, nasayran nga 278 ka traffic enforcers ug110 ka parking aide ug walo ka mobile patrol ang gipakatap sa Cebu City Traffic Office atol sa Sinulog. (Decemay P. Padilla/BDB)

Garbage management sa Sugbo gi-assist

Nagsugod na ang consultant sa Asian Development Bank, Mott MacDonald sa pag-assist sa garbage management sa Cebu City aron mo-rekomendar og waste management system nga i-establisar sa dili madugay.

Ang pangulo sa Cebu City Environment and Natural Resources (CCENRO) kanhi Konsehal Nida Cabrera mibutyag nga ang consultant nga gi-hire sa ADB nagsugod na kagahapon sa pagkuha og datos mahitungod sa waste generation sa siyudad.

Ipaubos sa review sa consultant ang broad economic, legal, technical, social ug environmental parameter sa proyekto.

Matud ni Cabrera ang consultant mohimo kini og pre-feasibility study sulod sa tulo ka buwan.

Human unya sa pre-feasibility study laing unom ka buwan ang itagana alang sa final feasibility study aron mahibaw-an kon unsa nga teknolohiya ang labing maayo alang sa siyudad nga maka-manage sa basura.

Kahinumduman nga ang ADB misanong sa hangyo sa kagamhanan sa siyudad nga mogahin og P40 milyones nga pundo alang sa feasibility study sa solid waste management.

Ang maong proyekto ubos kini sa Public-Private Partnership ug giingong ang ADB suhito usab kini sa mga technicalities.

Ang maong consultant motabang usab sa technical team sa dakbayan sa Sugbo sa pag-review sa 17 ka proposal alang sa  pag-establisar og waste to energy facility diha sa Inayawan Landfill. (BDB) (BANAT NEWS)