Halin sa tickets naapektahan

CEBU, Philippines — Mikunhod 20 hangtud 25 porsiyento ang gidaghanon sa mga nanan-aw sa pink ug green tickets sa sulod sa Cebu City Sports Center.

Kini maoy gitug-an ni Ricky Ballesteros ang Executive Director sa Sinulog Foundation nga nahinabi sa Banat News ug nagtuo siya nga naapektahan kini tungod kay dili maayo ang panahon sayo pa sa buntag nga gisugat dayon og kalit nga pagbunok sa uwan.

Gitug-an ni Ballesteros, mao nikubos ang namalit sa tag usa ka libo nga ticket kay basin gusto na lang sa katawhan nga magpabilin sa ilang panimalay ug motan-aw nalang og tv ilabi na dili masabtan ang panahon.

Apan matud niya daghan hinoon karon ang namalit sa yellow ug uban nga tickets ilabi na ang mga langyaw ug balikbayan gikan sa lain-lain nga lugar.

Sumala pa ni Ballesteros, mas daghan usab karong mga performers ang giganahan nga dili carousel ang sistemang gigamit kay mas dali na lang kanila ang pagsayaw ug parada.

Gitug-an ni Ballesteros, 16 ka mga led wall ang ilang gigamit sa stage karon tuiga nga nakapahayag og maayo sa entablado nga gisayawan sa mga dancers.

Sa pikas bahin bisan sa panagsang pag-ulan madasigon gihapon ang mga dancers ug sa mga nanan-aw sa parada.

Matud pa ni Albert Barcoma, usa sa mga sakop sa Tribu Catbalogan, sa Catbalogan City of Samar malipayon ra gihapon sila nga misayaw halad sa Batang Hesus.

Ang executive director sa Sinulog Ricky Ballesteros nitug-an nga atol sa briefing nila sa mga dancers ilaha gayud gipahibalo ang contingents nga ang mga costumes kinahanglang waterproof ug dili hasol para sa mga dancers bisan unsa pa ang lakat sa panahon. Giawhag usab ni Ballesteros ang mga contingents sa wala pa ang Sinulog nga mga sapatos nga haom sa stage ang ipasuot kanila. (BANAT NEWS)