Nanglibak diha sa Facebook nakiha gidakop
CEBU, Philippines — Gidakop niadtong Huwebes ang usa ka manindahay og saging human kini malutsi og warrant of arrest sa kasong cyber libel tungod sa iyang pagpanglibak pinaagi sa Facebook messenger sa iyang nakaaway didto sa Barangay Ticad, lungsod sa Bantayan.
Ang gidakop giila nga si Fretchelle Bayon-on Dawa, 23, residente sa Sitio Paraiso sa maong barangay. Sumala pa sa imbestigador sa maong kaso nga si PO2 Florante Desucatan nga niadto pang 2016 nahitabo ang pagpanglibak apan karon lang migawas ang warrant of arrest nga gipirmahan ni Judge Antonio Marigomen sa Regional Trial Court Branch 61 sa Dakbayan sa Bogo.
Matud pa nga gipakaulawan sa suspetsado ang biktima kansang pangalan wa ibutyag sa kapolisan gamit ang social media ug giingong naguba ang dungog niini.
Adunay piyansang P10 mil ang maong kaso apan wala makapiyansa ang maong dinakpan hinungdan nga kasamtangan kining nagtingkagol karon sa prisohan sa Bantayan Police Station.
Samtang, asoy pa ni Desucatan nga niadtong Oktobre gireklamo usab ang maong dinakpan sa mismong mayor sa ilang lungsod nga si Ian Escario human giingon nagbuhi og sakit nga mga pulong ngadto sa usa sa mga staff sa maong mayor.
"Iyang ka live-in sad nipasaka og libel niya. Pero wala pa toy warrant. Subpoena pa lang," si Desucatan miingon. (BANAT NEWS)
- Latest
