CPPO director mosurpresa sa mga police stations
CEBU, Philippines — Ipadayon sa director sa Cebu Provincial Police Office (CPPO) ang iyang pagsuroy sa matag police station sa kalungsuran ug component cities.
Kini human iyang nakita nga relax o kompiyansa ra kaayo sa ilang trabaho ang uban niyang sakop.
Si CCPO Director, Senior Supt. Edgar Alan Okubo, mao gyud ang nakasakop sa Toledo City Police Station nga igo lang gikandaduhan ug wala ang mga polis.
Sa niaging tuig, ang Talisay City Police Station sab ang iyang gibisita ug 12 ka polis ang wala atol sa iyang inspeksiyon kinsa anaa na karon sa Provincial Holding Unit ug gipaubos sa retraining ug seminar.
Nagkanayon si Okubo nga karon nga gipatas-an na ang sweldo sa mga polis ila unta kining suklian og maayo nga serbisyo sa katawhan.
Asoy pa niya nga ang pagbarug lang sa polis sa kadalanan makapugong na kini sa krimen tungod kay mataha man ang kriminal sa pagbuhat sa ilang dautang tinguha gumikan sa ilang presensya. Wala pa hinuon siya’y rekomendasyon sa pagrelibo sa mga sakop sa Toledo City Police Station ug gipaabot pa niya ang ilang tubag o mga rason kun nganong wala sila sa ilang buhatan. (GMR)(BANAT)
- Latest