Giingong wanted gidunggab patay sa Tokhang surrenderee

CEBU, Philippines — Patay ang usa ka lalake kinsa giingong wanted human kini dunggaba sa iyang kainom nga usa ka Tokhang surenderee niadtong Domingo sa gabii diha sa Barangay Cagsing, lungsod sa Ginatilan.

Ang suspetsado mao si Joel “Jojo” Gordes, 36-anyos, residente sa maong dapit ug giingong misurender kini sa Tokhang sa milabay’ng tuig.

Ang biktima giila sa kapolisan nga si Dolie Malalita, 36, residente sa dakbayan sa Mandaue giingong misibat kini sa ilang dapit tungod kay giingong wanted kabahin sa kaso nga ilegal nga drugas. Si Malalita nakaangkon og mga samad dinunggaban sa buko-buko, abaga ug liog nga maoy hinungdan sa iyang kamatayon.

Si Alipio Villarojo, uyoan sa suspek mibutyag nga ang maong insidente nahitabo diha sa iyahang panimalay diin nag-inom si Malalita ug Gordes.

Matud ni Villarojo nga niadtong higayona natulog siya diha sa ikaduhang andana sa iyang panimalay. Si Gordes kalit nga misaka ug gipukaw siya niini ug giingnan nga patawagon og polis kay napatay niya ang iyang kainom.

Si PO3 Ruben Catubig sa Ginatilan Police Station nagkanayon nga mibutyag kanila ang suspetsado nga napatay niya si Malalita tungod kay gibaharan siya niini hinungdan nga giunhan na lang niya kini og patay.

Giingong ang biktima nanabi nga isog siya sa ilahang lugar ug daghan na siyang napatay.

Dugang usab ni Catubig nga ang biktima naabot sa lungsod sa Ginatilan tungod kay giingong wanted kini sa ilang lugar kabahin sa kaso sa ilegal nga druga. (BANAT NEWS)