Kapin sa P300 mil kantidad sa shabu nasakmit
CEBU, Philippines — Mikabat ngadto sa P300,900 ang balor sa shabu nga nasakmit gikan sa usa ka gikatahong pusher diha sa Sitio Bato, Barangay Ermita, dakbayan sa Sugbo nidtong Martes sa gabii.
Ang suspetsado mao si Jurdans Bato, hingkod ang panuigon ug residente sa maong lugar giingong naaktohan nga naghupot og shabu atol sa pagpangronda sa kapolisan. Ang hepe sa City Intelligence Branch Chief Inspector Christopher Navida mibutyag nga nakadawat sila og reklamo nga mikusog na usab ang pagpamaligya og shabu diha sa maong dapit hinungdan nga gironda nila kini ug nasakpang naghupot og ginadiling drugas si Bato.
Nasakmit sa kapolisan gikan kang Bato ang 12 ka medium nga pakete ug 10 ka mga gagmay’ng pakete sa gidudahang shabu diin ang tanan adunay gibug-atong 25.5 ka gramo ug mobalor tanan ngadto sa P300,900.
Sa laing bahin, nadakpan sa gipahigayong buy-bust operation sa kapolisan ang tulo ka high value target nga pusher sa Lungsod sa Liloan.
Sa gipahigayong operasyon nila ni Chief Inspector Randy Korett, hepe sa Liloan Police Station diha sa Purok Tambis, Barangay Yati nasikop nila si Connie Gravada Cayatas ug Melljon Tuto Cayatas ug nasakmit gikan kanila ang shabu nga nagkantidad og P11,800.
Gawas sa nahisgutang mga suspetsado sa gipahigayong operasyon sa kapolisan diha sa Sitio Tabay Lawom, Barangay San Vicente, nasikop usab si Jay-R Marinduque Daitol, hingkod ang panuigon ug naimbargohan kini og upat ka gramong shabu nga mokantidad tanan sa P47, 200, drug paraphernalia ug usa ka kalibre .357 revolver nga dunay mga buhing bala.
Sa laing bahin usab, sa gipahigayong buy- bust operation sa City Intelligence Branch sa Lapul-Lapu City Police office diha sa Barangay Looc nasikop si Edgar Gilig Berame alyas “Egal”, 42-anyos, residente sa maong lugar.
Nasakmit gikan kaniya ang 11 ka gagmay’ng pakete sa shabu ug lima ka medium nga pakete nga shabu, P920 nga gituohang halin sa ginadiling drugas ug P500 nga buy-bust money. (BANAT NEWS)
- Latest
