Sinulog party hugtan sa pagbantay

CEBU, Philippines — Gibutyag ni Police Regional Office-7 Director, Chief Supt. Jose Mario Espino, nga pahugtan ang seguridad sa mga party karong Sinulog 2018.

Kini aron mapugngan nga makasulod ang mga ecstasy o mga party drugs sama sa flakka drugs o ang zombie drugs diin una nang gikatahong nakasulod na sa Sugbo.

"I have directed the Mandaue City Police Office to be strict on frisking the attendees (or party goers) and to engage with the security agency hired by the organizers. Nailatag na yung guidelines natin doon," matud ni Espino.

Sa Dakbayan sa Mandaue ipahigayon ang dakong party atol sa Sinulog human gibalibaran sa siyudad ang mga organizers.

Apil sa dakpon kung masakpan nga dunay ilegal nga drugas ang mga bouncers sa tigpasiugda.

Nasayran nga duha ka nasakpang tigpayuhot og party drugs ang nadakpan sa Philippine Drug Enforcement Agency-7 inabagan sa kapolisan niadtong Enero 12.

Base sa drugfreeworld.org, ang ecstasy usa ka happy drug diin bation og tumang kalipay ang moinom niini.

Apan delikado kini sanglit matud pa nga bisan unsa na lang ang gisagol-sagol niini nga mga drugas sama sa cocaine, heroin ug amphetamine ug methamphetamine nga mao sab ang gigamit sa pagmugna og shabu.

Matud pa nga ang uban sinagulan og rat poison, caffeine, dog deworming substances ug uban pa.

Samtang ang flakka drug o mas giila nga zombie drugs mao ang druga diin matud pa sa medicinenet.com nga makamugna og grabeng delusion sa mogamit niini.

Nunot niini delikado kini dili lang sa mogamit apan lakip na sab ang mga tawo sa palibot tungod kay manakit na siya sa iyang isig ka tawo sanglit wala na siya sa iyang kaugalingon.

Sa youtube.com, ubay-ubay na ang mga video nga nagpakita og epekto sa mga nigamit og flakka diin silang tanan nangahimo og sama sa zombie.

Pipila sa mga kausaban nga gipatuman atol sa Sinulog mao ang limitado lang nga pagtugot nga makapahigayon og kalihukan sama sa concert, parties ug uban pa.

Usa lang ang gihatagan og pagtugot sa kagamhanan sa Siyudad sa Sugbo nga makapahigayon og party.

Matud ni Konsehal Dave Tumulak, executive committee chairman sa Sinulog, nga kagahapon sa buntag niadto ang organizer sa kalihukan nga mahitabo sa Cebu Business Park ug matud pa nga nipasalig nga dili samok ang ilang kalihukan.

Bisan pa man sa pasalig gipahibawo ni Tumulak ang organizer nga duna lang gihapoy mga sakop sa PDEA-7 ug kapolisan nga magbantay.

“Ako mismo motuyok ug makita nato naay complaints stop gyud,” matud ni Tumulak. (BANAT NEWS)