VECO way nadawat nga sodium lights
CEBU, Philippines — Giklaro sa Visayan Electric Company (VECO) nga wala gyud sila kadawat og mga suga o sodium lights gikan sa kagamhanan sa Siyudad sa Talisay.
Kini sukwahi sa pamahayag ni City Engineer Gamaliel Vicente Jr. nga 200 ka sodium lights ang ilang gihatag ngadto sa VECO aron ipangtaud sa South Road Properties (SRP) nga putol-putol ang kahayag.
Sa gipagawas nga official statement sa VECO nag-ingon nga ang kagamhanan sa Siyudad sa Talisay nipadala og request kanila aron maoy motaud sa mga sodium lamps.
Gani karong semanaha unta sila motrabaho niini pero magdepende kini sa panahon kay dili sila makataud sa mga suga ilabi na kung uwan.
“VECO did not receive nor will it accept sodium lamps from Talisay or any LGU or organization. We assist LGUs and subdivisions in the installation of sodium lamps but these lamps remain with the LGU or the subdivision,” matud sa official statement sa VECO.
Sa nasayran, si Vicente ang nipahibawo nga mahayag na unya ang Dakbayan sa Talisay gumikan kay nipalit na sila og 10 ka solar panel nga maoy gamiton sa elektrisidad.
Ang matag usa ka solar panel mokantidad og P80 mil ngadto sa P90 mil nga mapuslan sulod sa 15 ngadto sa 20 ka tuig.
Matud ni Vicente nga wala sila nibiya sa VECO ilabi na sa suga sa South Road Properties. (BANAT NEWS)
- Latest
