Engkuwentro sa pasahero ug taxi driver imbestigahon sa LTFRB
CEBU, Philippines — Ang Land Transportation Franchising and Regulatory Board (LTFRB)-7 mopahigayon og imbestigasyon kalabot sa nag-viral nga video diha sa Facebook kalabot sa usa babaye nga nasuko ug giingong namugno og usa ka taxi driver nga nibalibad og pagpasakay kaniya.
Sa Facebook post sa account ni Christian Grey Ceniza gisaysay nga ang driver sa usa ka taxi nga padulong na unta kini sa dakbayan sa Mandaue ug padulong na mogarahe hinungdan nga gibalibaran niini ang pasahero nga babaye.
Apan nakit-an na lang sa babaye nga ang taxi nipasakay kini og laing pasahero hinungdan sa pagkalagot niini.
“Then suddenly naay nipara ug gihangyo guro na mosakay kay going to Mandaue pud ang nipara. Ug kalit nituktok ang “gore” (tiguwang nga babaye) ug niana na dapat dili na mo pick-up kay garahe na.
Nasuko ang tiguwang ug gipicturan ang driver, ni-explain ang driver nga maong gipasakay kay parehas og destinasyon”, ni Ceniza sa iyang Facebook post.
Ang post ni Ceniza adunay duha ka hulagway ug duha ka videos sa maong panghitabo kon ang babaye nga giingong nangumot og drayber nagkanayon nga aduna siya’y high blood.
Ang maong post ni Ceniza nakaangkon na kini og 225 ka reactions, 180 shares hangtud sa pagsulat niining balita.
Si Ahmed Cuizon, regional director sa LTFRB-7 nagkanayon nga mohimo sila og pakisusi sa maong insidente ug ilang ipatawag ang driver ug operator lakip na usab ang maong babaye.
Si Cuizon nitataw nga kon ang usa ka taxi wala pay gibutang nga signage nga “garage” sa atubangan nga bahin sa iyang sakyanan kinahanglan gyud kini nga mo pick-up og pasahero ug dili mobalibad.
Siya mipasabot nga mamahimo makabalibad ang driver og pasahero basta lang magbutang kini og “on call” nga signage sa iyang sakyanan. (BANAT NEWS)
- Latest